Accessibility links

Кайнар хәбәр

Tatarstanğa Rusiäneñ çit illärdäge ilçeläre …


Tatarstanğa Rusiäneñ çit illärdäge ilçeläre …

Sişämbe könne Qazan uramnarında avtotransport yörtüçelär öçen mäşäqätlär kilep çıqtı. Däwlät avtoinspeksiäse bu östämä mäşäqätlär öçen ğafu ütende. Qazanda bu könnärdä qunaqlar küp, şuña kürä beraz çıdarğa, sabırlıq kürsätergä kiñäş itelde. Başta Qazanğa Rusiäneñ Braziliädäge, Kolumbiädäge, Qırğızıstandağı häm Paqstandağı ilçeläre kilde. Mäğlüm bulğança, Rusiä prezidentı Vladimir Putin Rusiäneñ çit illärdäge ğadättän tış häm tulı wäkälätle ilçeläre belän oçraşu ütkärgän ide. Oçraşu barışında ilçelärgä töbäklärdäge xäl belän yaqınnanraq tanışırğa kiñäş itelde, çönki Rusiädä citeşterelgän tawarlarnı çit il bazarlarına çığarırğa kiräk. Şuña kürä Tatarstanğa da iqtisadi mömkinleklär belän tanışu, ere biznes citäkçeläre belän küzgä-küz qarap söyläşü öçen dürt ilçe kilde. İlçelär vizitların bik eşlekle başladılar. Premyer-ministr Röstäm Miñnexanov belän, säwdä häm tışqı elemtälär ministrlığı citäkçeläre belän tügäräk östäl artında söyläşülär alıp bardılar. Söyläşülär barışında Braziliä belän säwdä ğamäldä alıp barılmawı, Qırğızıstan, Paqstan belän dä tışqı säwdä äyläneşeneñ bik az buluı bilgelänep ütelde. Tatarstannıñ Kolumbiägä Mİ-17 boralaqları satu täcribäse bar. Şuña kürä bu illär belän säwdä eşlären canlandırıp cibärüdä Tatarstannıñ da mänfäğätläre zur. Şuña kürä ilçelär Tatarstan prezidentı belän oçraşıp, bu eşlärgä annan da fatixa aldılar häm tağın da süzlärdän eşkä kereşü niätennän sişämbe könne Tübän Kamadağı häm Çallıdağı nefteximiä sänäğät şirkätläre towarları belän yaqınnanraq tanışıp yördelär.
XS
SM
MD
LG