Respublika yuğarı uqu yortlarında berençe kerü imtixannarı uzdı

Pänceşämbe könne respublika yuğarı uqu yortlarında berençe kerü imtixannarı uzdı. Statistika bıyıl iñ yuğarı konkurs, yäğni, ber urınğa turı kilgän ğarizalar sanı iqtisadçı häm jurnalist belgeçlegenä dip kürsätä. Yuğarı uqu yortlarınıñ şundıy belgeçlek fakultetlarına ber urınğa 5-6 abiturient turı kilä. Läkin bu statistika bik şartlı. Berençedän, ber abiturient berniçä yuğarı uqu yortına ğariza birä häm, ğädättä, berençe imtixannı birgännän soñ qaysıdır bersen saylap, şunda qala. İkençedän, bıyıl abiturientlar arasında mäktäpne medalgä tämamlawçılar küp. Yuğarı uqu yortlarına kergändä, alarnıñ xoquqları östen bulğanğa kürä, prestijlı belgeçleklärgä konkurs arta. Xäzerge zamanda yuğarı belem alırğa telägän keşegä zur konkurslardan uzunıñ başqa yulı da bar. Här uqu yortında äle kommersiä urınnarı, yäğni, aqça tüläp uqu urınnarı bar. Ägär dä büdjet urınnarına, yäğni däwlät xisabına uqıtıla torğan urınğa ütä almasañ, yılına 10-15 meñ sum tüläp kommersiä kileşüe nigezendä yuğarı belem alırğa mömkin.