Rusiä-Belorusiä berlege särqätibe Pavel Borodin Tatarstanda

İnde xäbär itkänebezçä, pänceşämbe könne Tatarstanğa Rusiä-Belorusiä berlege särqätibe Pavel Borodin kilde. Räsmi mäğlümat çaraları anıñ prezident Mintimer Şäymiev belän oçraşıp söyläşüe turında xäbär itte. Söyläşülär yabıq işeklär artında ütkärelde. Şuña kürä älegä Pavel Borodinnıñ kilüenä kommentariylar yuq. Barı tik, oçraşu barışında Rusiä häm Belorusiä arasında integratsiädä Tatarstan rolen bilgeläwçe mäs’älälär tikşerelde, dielä. Rusiä häm Belorusiä arasında tawar äyläneşendä Tatarstan citdi urın tota. Tatarstan öleşe monda 100 million dollardan artıq ikän häm Tatarstan Belorusiä belän uñışlı eş itüçe töbäklärneñ berençe unlığına kerä. Pavel Borodin oçraşudan soñ Çallığa KamAZ aksionerlıq cämğıäte eşçänlege belän yaqınnan tanışırğa kitep bardı.