Qazanğa Misırnıñ Rusiädäge häm Belorusiädäge ilçese kilde.

İlçelär tatar cirenä tartıla. Soñğı arada Qazanğa ber-ber artlı Rusiädäge törle illärneñ ilçeläre kilep tora. Alarnı qabul itü dä, Qazannı kürsätü dä, söyläşülärneñ teması da bik oxşaş. Aldan möğtäbär qunaqlarnı prezident qabul itä, ä annan başqalar. Näticädä niätlär protokolı, iqtisad ölkäsendä kileşülär häm älege ilgä delegatsiä belän barıp qaytular. Añlaşıla ki, ilçelärne qabul itü, söyläşülärneñ tematikası Mäskäw belän aldan kileşengän bula. Comğa könne Qazanğa çirattağı qunaq Misırnıñ Rusiädäge häm Belorusiädäge ğädättän tış häm wäkälätle ilçese Reda Äxmät Şexata kilde. Qazan Kremlendä ul prezident Mintimer Şäymiev belän oçraştı, söyläşülär alıp bardı. Misır ilçese Tatarstanğa berençe tapqır ğına kilmi. Monda urtaq eşlär dä, yaña proektlar da bar. İsegezgä töşerim: 1997 yılda Şäymiev Misırğa räsmi vizit yasağan ide. Anıñ barışında ul Misırnıñ prezidentı Xösni Möbäräk belän oçraştı, söyläşülär alıp bardı. Äytergä kiräk, şunnan soñ Misır-Tatarstan arasında säwdä, iqtisadıy wä mädäni elemtälär nıği başladı.