Accessibility links

Кайнар хәбәр

Däwlät Duması deputatları Flera Ziatdinova belän Sergey Şaşurin Tatarstan televideniese aşa çığış yasadı


Däwlät Duması deputatları Flera Ziatdinova belän Sergey Şaşurin Tatarstan televideniese aşa çığış yasadı

Pänceşämbe kiç Tatarstan däwlät telekanalı aşa bezneñ respublikadan saylanğan Däwlät Duması deputatları Flera Ziatdinova belän Sergey Şaşurin çığış yasadı. 10-15 minutqa suzılğan monologlarında ike deputat ta saylawçılarnıñ mänfäğätlären qayğırtu turında baytaq süz äyttelär. Deputat Şaşurin “Tatarstan telekanalı aşa çığış yasaw xoquqına Rusiäneñ general' prokuraturası yardäme belän genä ireştem”, dip belderde. Çönki ul xaqiqätne turıdan bärä, ä bu respublika citäkçelärenä oşamıy ikän. Soñğı aylarda Sergey Şaşurin yış qına “Dulqın” radiosı aşa çığışlar yasap, Babayğa, anıñ yaqınnarına, xökümät türälärenä kompromatnı mul taşladı. Häm töp argument itep ul, ğädättä, “menä bit, minem tänqitne alarnıñ berse dä inqär itmi, dimäk, min xaqlı”, di. Ğadi xalıqqa oşarğa tırışıp, Şaşurin elek tä säyäsi bäxäsläşülärneñ kirtälären watıp-cimerep, populistik çığışlar yasap kilde. Äye, tänqitlänüçelär anıñ belän älegä xätle bäxäskä kermädelär, aqlanırğa tırışmadılar. Läkin, bu alarnıñ çınnan da ğäyıple ikänen raslamıy bit äle. Bolay dip sanaw – iñ kimendä, berqatlılıq. Bälkem, Sergey Petroviçnıñ usal telenä elägüçelär mäğlüm ber mäqälne istä totıp, “ul närsägä timä – sasırsıñ”, dip eş itkänder. Däwlät Duması deputatı teläsä närsä söylärgä xaqlıdır. Läkin ikençe yaq ta andıy yögänsez oratorğa pretenziälär quyarğa xaqlı. Häm mäxkämä tarafınnan isbatlanmağan kompramat öçen deputatlarnıñ härqaysı cawap totarğa tieş tügelme? Älegä Sergey Petroviç pänceşämbedäge wäğäzen “közgä bez Tatarstannı da çistarta başlıybız”, digänräk mäğnädä tämamlandı. Kem ul bez? Häm närsädän çistarta başlıylar? Monısın deputat televizor qarawçılarnıñ fantaziäsenä qaldırdı. Qızğanıç... Ğadi keşelärgä söyliseñ ikän – añlayışlıraq söylärgä ide.
XS
SM
MD
LG