Accessibility links

Кайнар хәбәр

Qazannıñ İrek mäydanına nindi isem bireler?


Qazannıñ İrek mäydanına nindi isem bireler?

Uzğan xäbärebezdä söylägänçä, ministrlar kabinetınıñ sişämbe brifinğı Qazannıñ meñ yıllığına äzerlek eşlärenä bağışlanğan ide. Citäkçelärneñ şoma ğına xisap totuı, bigräktä finanslaw yaqşı baru turındağı süzlär Qazan şähär administratsiäse türälären şaqtıy därtländerep cibärde. İnde berniçä kön, xäbärlärdä, Qazannıñ bu cire üzgärtep qorıla, tege cire yañartıla digän därtle notıqlar işetelä. Şulay, Qazannıñ üzäk stadion qarşındağı Yärminkä mäydanı, süzdä ör yañadan üzgärtep qorıldı. Bolaq buyları yalt itte. Qamal teatrı qarşındağı mäydanğa da qul citäçäk, Alla boyırsa.

Ä çärşämbe könne, kiçke xäbärlärdä şähärneñ arxitektura häm şähär tözeleşe idäräse başlığı urınbasarı Rozaliä Norğalieva sensatsion yañalıq äytte. Qazan üzägendäge İrek mäydänı isemen dä, cisemen dä üzgärtäçäk. Mäğlüm ki, bu mäydan tiräsendäge binalar yañartıla. Xäzerge waqıtta “ofitserlar yortı” binası (ul şähär ratuşasına äylänäçäk) häm Ministrlar Kabinetı (elekkege Obkom) binası üzgärtep qorıla. Tizdän İrek mäydanınıñ kürke bulğan, Musa Cälil isemendäge opera häm balet teatrı binasında da üzgärtep qoru, yañartu eşläre tämämlanaçaq. Şunnan soñ, şähärneñ baş arxitektura idaräse İrek mäydanın Teatr mäydanı itep üzgärtergä niätli. Hättä Rozaliä Norğalieva İrek mäydanındağı Lenin häykälen demontajlau farazlana dip tä cibärä.

Mondıy sensatsion belderü, älbättä, cämäğätçelekne, jurnalistlarnı äsärländerde. Tarixi istäleklär, häykällär saqlaw bülegenä jurnalistlar bertuqtawsız şaltırata. Cawap ber: İrek mäydanındağı Lenin häykäle, başqa tarixi istäleklär kebek uq, däwlät saqlawında. Tatarstan mädäniät ministrı urınbassarı Rafael Wäliev “İrek mäydanınıñ ber öleşen, teatr qarşındağı öleşen, Teatral mäydanı dip atau täqdimnäre bar” dide. “Läkin Lenin häykälen demontajlau kebek ideyälär — farazlar ğına bulıp qala. Bernindi dä xökümät qararı yuq.”

Musa Cälil isemendäge Opera häm balet teatrı binası, mäğlüm bulğança, 50-nçe yıllar urtalarında tözelep betkän. Lenin häykäle quyılğançı, bu urında, böek urus yazuçısı Derjavin häykäle bulğan. Ägärdä inde iske isemnärne äbi patşa, yä bulmasa, Nikolay patşa zamanındağı isemnärne qaytaru mantıyğı belän barsañ, İrek mäydanın Derjavin baqçası dip iğlan itärgä kiräk bulır ide.

İrek mäydanı Tatarstannıñ yaña tarixına kergän mäydan. İrek mäydanı Tatarstan möstäqıllege öçen köräş urınnına äwerelde. Ul -- Tatarstan möstäqıllegen iğlan itkän İrek mäydanı.
XS
SM
MD
LG