Accessibility links

Tatarstan teleradiokompaniälärendä üzgärtep qorular bara


Tatarstan teleradiokompaniälärendä üzgärtep qorular bara

Xäbärlärebezdä Tatarstan Däwlät teleradiokompaniäsendä barğan üzgärtep qorularınıñ niçek awır baruı turında söyläp kiläbez. Çınnan da, mal bülüe awır mäsälä bulıp çıqtı. Bu wäzğıät radio, televidenie jurnalistlarınıñ da xäyran ğına bolğattı. Adäm balası da dımlıraq cirne ezli. Qayda yaxşıraq bulır soñ? Ber könne tulı ber redaksiä “Tatarstan yaña ğasır”ğa küçü turında ğariza birä. İkençe könne bu ğarizanıñ yuqqa çığuı, barısı da üz urınında qaluı turında mäğlüm bula.

İnde söylägänebezçä, 19 avgust könne ber-bersennän ayırılğan däwlät televideniese häm “Tatarstan yaña ğasır” televideniese tapşıruları küplärgä GKÇP könen xäterlätte. Un yıl buyı çığıp kilgän häm tamaşaçı küñelenä señgän “Çulpan” programması efirğa çıqmadı. Tamaşaçılar aptıradılar. Nigä 24 säğät tatarça häm rusça tapşırular alıp barırğa tieşle “Tatarstan yaña ğasır” televideniese “Çulpan”nı üzenä almıy? Nigä qaş yasıym dip küz çığarğanday, “Dobroe utro, Tatarstan” digän ör yaña programma çığarırğa äzerlänep yöri. Häm nigä bu butalçıqlar tatarça tapşırular özelülär näq Bötendönya tatar kongressına sanawlı könnär qalğanda bara? Küräseñ, televidenie, radio xucaları uyınnan uymaq çığuın abayladılar. 22 avgust könne irtänge 7.00 “Tatarstan yaña ğasır” televideniesendä “Çulpan” programması başlanıp kitte. Älegä “Доброе утро, Татарстан” äzer bulğançı “Çulpan” yäşäyäçäk ikän. Şulay uq böten redaksiäse belän “Tatarstan yaña ğasır” televideniesenä küçkän tatarça xäbärlär, däwlät televideniesendä retranslyatsiälänäçäk, digän küñelle xäbär dä bar. Tatarça xäbärlär şulay uq soñğı waqıtta efirdan yuqqa çığıp torğan ide.

“Tatarstan yaña ğasır” teleradiokompaniäse general' direktorı urınbasarı Miläwşä Aytuganova 26 avgust könne “Yaña ğasır digän” informatsion-muzıkal' radio üz programmaların translyatsiäli başlıy, dip belderde. “Yaña ğasır FM” radiosı älegä “Bolğar FM” yışlığında eşliäçäk. “Bolğar FM” da şul uq yışlıqlarda kiçen häm tönlä eşliäçäk. Soñraq “Yaña ğasır“ radiosı ternäklänep kitep 24 säğät buyı ike däwlät telendä dä eşli başlayaçaq, “Bolğar FM” başqa yışlıqqa küçäçäk. Bügenge köngä “Yaña ğasır” radiosın Tatarstan xalqınıñ 85 % tıñlıy alaçaq, dip belderelä. 2003 yılda elemtä ministrlığı respublikada 26 yaña tapşırğıç quyaçaq. Häm “Yaña ğasır” radiosın böten respublika tıñlıyaçaq. Yaña ğasır sentäber ayında qısqa dulqınnarda da eşli başlayaçaq, dielä. Şul uq waqıtta anıñ İnternet säxifäse dä açılaçaq.
XS
SM
MD
LG