5 sentäberdä Däwlät Şurasınıñ sessiäse açıla

Tatarstanda cılı könnär torsa da, cäy tämamlanıp, köz citüe inde sizelä başladı. Bıyıl ğädättägeçä 1sentäberdän tügel, ä 2-sennän uqunı başlağan uquçılar, studentlar monı bigräk tä yaxşı toyalar. Läkin köz citü belän uquçılar ğına tügel, deputatlar da üz eşlärenä kereşä. Menä Tatarstan respublikasınıñ Däwlät Şurası deputatları da cäyge yallardan soñ üzläreneñ 13 plenar sessiälärenä cıyılaçaq. Sessiä 5 sentäberdä açılaçaq häm ike kön däwam itäçäk, dip kötelä. Yallar bik ozaq bulğanğadır inde, eşlär dä bik küp cıyılğan. Deputatlarnıñ kön tärtibendä 80-nän artıq mäsälä qaralğan. Alarnıñ berniçäse Tatarstan prokurorı protestları nigezendä respublikanıñ qayber qanunnarınıñ köçen yuğaltuın tanu yäisä alarğa üzgäreşlär kertü turında. Şul 13 protest arasınnan Däwlät Sovetı Rusiä general' prokurorı urnbasarı Zvyaginsevnıñ «Tatarstan respublikası konstitutsiäsenä üzgäreşlär häm östämälär kertü turında»ğı qanunğa, añlayışlıraq itep äytkändä, respublika konstitsiäseneñ yaña redaksiäsenä qarata protestına mönäsäbäten dä belderergä tieş. Şunısın da äytep ütik, bu mäsäläne 10 sentäberdä Tatarstannıñ Yuğarı sudında tikşerü dä küzdä totıla.