Tatarstan häm Başqortostanda xalıq sanın alu bara…

Rusiädä xalıq sanın isäpkä alu kampaniäse başlanuında tatarstanlılıar öçen berençe qaraşqa şaqqatırğıç yañalıq buldı. Mäğlüm ki, Rusiäneñ barlıq televidenie kanalları prezident Vladimir Putinnıñ isäpkä aluçılarnıñ sorawlarına cawap birü süjetın qabat-qabat kürsätte. İsäpkä aluçı qız bala açıq itep, “Ваш родной язык”, yäğni “Sezneñ tuğan telegez” digän soraw birde häm Vladimir Putin açıq itep “русский” dip cawap birde. Tatarstanlılar moña bigräk iğtibar itte, çönki anketada mondıy soraw yuq ide, ana telebez “иные языки”, yäğni “başqa tellär” rätenä kerep qalası ide. Xalıq sanın alğanda, şuşı soraw quyılğanı mäğlüm bulğaç, xätta, Vladimir Putin Qazanda III Bötendönya tatar kongressında qatnaşuçılar belän oçraşqannan soñ qayber üzgäreşlär kertkän häm anketada şundıy östämä soraw barlıqqa kilgän digän imeş-mimeşlär yöri başladı. Läkin Qazanda perepisçiklar sorawlarına cawap birgän tanış-beleşlär “mondıy soraw quyılmadı” dilär. Eş närsädä soñ?