Mäskäwdä Qazan xanlığınıñ Rusiägä quşıluı turında citdi söyläşü kötelä

Pänceşämbe könne Mäskäwdä dä ber qızıqlı cıyılış ütäçäk. 14 noyäbr könne, säğät 10-da Mäskäwneñ Dmitriy Ul’yanov isemendäge uramında urnaşqan Rusiä tarixı institutında bilgele tarixçılarnıñ tügäräk östäle ütäçäk. Anıñ teması — «İdel buyınıñ Rusiägä quşıluına 21 ğasırdan qaraş». Tügäräk östäldä şuşı temağa törle fikerdä toruçı ğalimnär çığış yasıyaçaq. Mäskäw ğalimnäreneñ küpçelegeneñ bu waqiğa turında uñay fiker yörtüe ser tügel. Şul uq waqıtta, Qazan xanlığınıñ Rusiägä buysındırıluı milli faciğä ikänlegen añlawçılar da bar. Qazannan bu bik möhim fänni söyläşügä berniçä ğalim barırğa cıyınsa da, alarnıñ qayberäwläre çit ilgä kitü, ikençeläre Qazandağı möhim mäşäqätlär kilep çığu säbäple Mäskäwgä kitmäde. Şulay itep, tatar xalqı häm Qazan ğalimnäre isemennän älege tügäräk östäldä tarix fännäre doktorı Damir İsxakov qatnaşaçaq. Mäskäwdän qaytqaç şuşı tügäräk östäldä yañğırağan fikerlär turında Damir äfände tulıraq mäğlümätlär citkerer dip ışanıp qalabız.