“Vesti nedeli” terrorçılarnı xuplağan Tatarstan televideniesen “faş itte”

Yäkşämbe kiçendä Tatarstan televideniesendä 24 oktäberdä efirğa çıqqan tapşırunı kürsätep, andağı çığışlarnı terrorçılarnı yaqlaw, dip atadılar. Tatarstandağı milli xäräkät niqädär sülpän, ezleksez, dip sanalsa da, bu yulı bik qurqınıç, separatistik ğämäl dip kürsätelde. Yarıy äle bu yulı Çallıda tözelä başlağan çirkäw nigezen aqtarğan äbilär yäki Quqmarağa Kavkazdan häm Başqortostannan kilep gaz trubasın şartlatırğa awıl yegetlären qotırtuçı diversantlar kürsätelmäde. Läkin barıber Tatarstan, terror, diversiä, millätçelek, separatistik, Çeçnya digän töşençälär kön sayın, säğät sayın yañğırap tora. Menä şuşı şartlarda da Tatarstanda xäzergä bernindi totıqlar alınmıy, radikal millätçelär xökümät organnarında eşläp, säyäsi qiblanı demokratiädän çitkä bormıy, millätlär arasında tınıçlıq bozılmıy. Ägär dä televizor qaramasañ, Mäskäw gäzitlären uqımasañ, Tatarstanda äybät kenä yäşäp bula.