Tatarstan belän Qıtay arasında säwdä-iqtisadi bäyläneşlär kiñäyä

Tatarstan da Rusiädän ber dä qalışmıy. Rusiä prezidentı Qıtayda aralarnı yaqınaytıp yörsä, şul uq waqıtta Qazanda da Qıtay wäkilläre respublika belän mönäsäbätlärne caylıy. Şuşı könnärdä Qıtay xalıq respublikasınıñ eşlekle dairä wäkilläre Qazanda räsmi säfärdä buldılar. Sişämbe könne Qıtay delegatsiäsen Tatarstannıñ Säwdä häm tışqı iqtisadi xezmättäşlek ministrı Xafiz Salixov qabul itte. Älege eşlekle oçraşu waqıtında qunaqlarnı respublikanıñ töp sotsial'-iqtisadi üseş kürsätkeçläre, Tatarstannıñ ere şirqätläre häm alar citeşterä torğan produksiä belän tanıştırdılar. Şunısın da äytergä kiräk, Tatarstan belän Qıtay arasındağı iqtisadi bäyläneşlär 1999 yıldan birle däwam itä. İke yaq arasındağı säwdä äyläneşe, mäsälän, 60 millionnan artıq amerika dolların täşkil itä. Kiläçäktä bu san tağın da artır, dip kötelä. Älegä Tatarstannıñ tışqı iqtisadi säwdä äyläneşe küläme buyınça Qıtay 9 urında tora, dip xäbär itä İntertat.ru İnternet gäcite. Çärşämbe, 4 dekaber könne, respublika xökümäte üzeneñ çirattağı utırışında yänä toraq-kommunal' xucalığınıñ reformasın tikşerde. Älege küptän kötelgän, küp söylängän reforma Tatarstanda 2003 yılda başlanır, dip kötelä. Utırışta prezident Mintimer Şäymiev tä qatnaştı. Şul uq könne Tatarstan prezidentı Qazannıñ kürgäzmälär üzägendä utä torğan 4 maxsus «Energetika häm resurslarnı saqlaw» dip isemlängän kürgäzmä belän dä tanıştı.