Accessibility links

Pravoslavie däresläre Tatarstanda kerteläçäkme?


Däwlät Sovetınıñ sessiäsendä Rusiä prezidentı Vladimir Putinğa ike möräcäğät qabul itelde. Berençese, Rusiä xalıqlarınıñ älifbaların kirillaştıru turındağı tözätmäne raslamawnı sorap, ikençese – barlıq mäktäplärdä dä köçläp digändäy pravoslav dinen uqıtu turında mäğärif minsistrı prikazına qarşı kilü. Här ike möräcäğät tä şaqtıy kisken formada yazılğan. Häm federal'' üzäkneñ millätlärgä, pravoslav dinennän başqa din totuçılarğa qatı mönäsäbät kürsätüe oçraqlı tügel. Mäskäwdäge “Nord-Ost” faciğäsennän soñ, şovinistik häm islamğa qarşı köçlär canlanıp kitte. Tatarstandağı rus cämğiätläreneñ wäkilläre Vladimir Putinğa bik kisken xat yazu, alarnıñ Tatarstanda rus telen öyränü, rus mädäniäten üsterü öçen şartlar yuq, gel tatar milli tormışı ğına üsterelä digän däğwälär belderü, näq menä şuşı Mäskäw faciğasennän soñ buldı.

Pravoslav dinen Tatarstan mäktäplärendä uqıtaçaqlarmı, digän soraw belän bez respublikanıñ mäğärif ministrı Färis Fäxräz ulı Xarisovqa möräcäğät ittek:

Rusiä konstitutsiäse buyınça din däwlättän ayırılğan. Şulay uq bu prikaz mäğärif qanunnarına da qarşı kilä. Rusiä küp konfessiäle häm küp millätle däwlät, şuña kürä, ayırıp balalarğa ber genä dinneñ nigezlären öyrätü ul xalıqlar arasındağı duslıqnı nığıta torğan äyber tügel. Tatarstanda bez inde küptännän «Mäktäp häm din» digän laboratoriä açıp, uqıtuçılarğa maxsus kurs uqıtabız. Anda uqıtuçılarğa dinnärneñ tarixı, dönya dinnäre turında uqıtıla. Bu eş menä şuşındıy yünäleştä alıp barılğanda ğına konfessiälär arasında nizağlar çıqmayaçaq. Kiresençä, bez balalarğa här dinneñ yaxşı yaqların citkeräçäkbez.

Tatarstannıñ mäğärif ministrı Färis Fäxräz ulı Xarisov rus telen häm mädäniäten öyränü tieşle däräcädä quyılğan, tatar häm rus tellären ber-bersenä qarşı quyarğa yaramıy, dip belderde.
XS
SM
MD
LG