Accessibility links

Кайнар хәбәр

Boris Yeltsin Qazanğa ni öçen kilgän?


Könneñ iñ aktual sorawı şulay yañğırıy: Boris Yeltsin Qazanğa nik kilgän? Aña närsä kiräk? Sişämbe kön räsmi mäğlümät çaraları Boris Yeltsinnıñ xäläl cefete Naina xanım belän Qazan universitetında buluı häm Qazan Arbatı dip yörtelgän Bawman uramın qarap tanışıp yörgännäre turında xäbär ittelär. Qazanda, Tatarstanda prezident eşläw däwerendä ike tapqır, şulay uq yäş çağında da qayçandır bulğan Boris Yeltsin ataqlı Qazan universitetın kürgäne yuq ikän äle. Şuña kürä anı Qazan universitetı belän awıldan kanikullarğa täwge märtäbä başqalağa kilgän mäktäp balaları kebek universitet belän tanışqanda, anıñ tarixı, Ulyanov-Lenin belän bäyle tarixi auditoriä belän tanıştırudan başlağannar. Universitetnıñ Aktlar zalı belän tanışqaç, andağı tarixi känäfilärdä utırıp qarağaç, Boris Yeltsin tatar häm rus fänenä, mädäniätenä unışlar telägän häm älege zalda imperator ğalicänäpläre Aleksandr II portretın elärgä täqdim itte, dielä İntertat.ru säxifäsendä.

Yeltsinnarnıñ Bawman uramı belän tanışuı da şundıyraq ruxta bulğan. Boris Yeltsin hönäre buyınça tözüçe buluın iskärtep, Bawman uramındağı üzgärtep qorularnı maqtağan. Ber urında tuqtap, jurnalistlar belän söyläşep ta alğan. Xäyer, ul Qazan hawa qırında uq elekke waqıtlarnı, federatsiä tözü, Tatarstan belän şartnamä nigezendä mönäsäbätlär urnaştıru çorın sağınıp kilgänen äytkän ide. Bawman uramında da ul üze prezidentlıq itkän çornı maqtadı. Mintimer Şäymievne dä şul çordan birle xaqimiättä qalğan citäkçe bularaq maqtadı.
XS
SM
MD
LG