Bötenläy tınıç tormış, Yaña yıl kanikulları disäñ dä, dönya üz yulınnan bara. Bıyılğı Yaña yıl bäyrämnärendä törle maşina qazaları, yöräk öyänäkläre, bäxetsezlek oçraqları, cinayät qılular başqa yıllarğa qarağanda kübräk bulğan ikän. Näq Yaña yıl könnärendä Çallıdan küñelsez xäbärlär kilde. KamAZ aksionerlıq cämğiäteneñ direksiäse ozaq yıllar buyı tatarça eşläp kilgän “Nur” gazetın yabarğa bulğan. Bu xaqta şikäyät-möräcäğätlär ictimaği oyışmalarğa da, däwlät orğannarına da kilde. Tatarstan radiosınıñ düşämbe çığarılışında da älege xäwefle waqiğağa iğtibar birelde. Älbättä, här zavod üze täşkil itkän mäğlümat çarasınıñ yazmışın üze xäl itä ala. Monda däwlätneñ yäki xakimiätneñ qatnaşı yuq. Şulay da tatar teleneñ yäşäw tirälegen kiñäytü öçen tırışıp yatqanda, milli teldäge gazetnı yabu awır tä'sir qaldıra. Çallıdan kilgän möräcäğätne tikşerü öçen Tatar kongressı törle oyışma wäkillärennän torğan komissiä tözergä buldı. Bu komissiä zavod administratsiäse häm cirle xakimiätneñ dä añlatmaların öyränergä cıyına.
