Accessibility links

Çit ildäge millättäşlär kiräkme?


Bötendönya tatar kongressınıñ xalıqara mönäsäbätlär häm keşe xoquqları komissiäseneñ utırışı uzdı. Anda tanılğan ğalimnär, säyäsätçelär, cämäğät eşlekleläre, jurnalistlar qatnaştı.

Bötendönya tatar kongressınıñ Başqarma komitetı räise Rinat Zakirov çit illärdä yäşäwçe millättäşlärebezneñ problemaları, alarnı çişü yulları turında söyläde. Fiker alışuçılar yıraq häm yaqın çit illärdä yäşäwçe tatarlardan bezgä ni fayda, alar bezgä nigä kiräk dip yörüçelärneñ matbuğat bitlärendä çığış yasawlarına iğtibar ittelär. Qazan däwlät universitetı professorı Mirqasıym Ğosmanov, ğalim İlbaris Nadirov mondıy mönäsäbätlärneñ millätne tarqatuğa, üzara añlaşmaw fiker qıtlığına, krizisqa kiterä, dip borçılıp söylädelär.

Komissiä utırışında BDB illärendä yäşäwçe 1 million yarım millättäşlärebezneñ xäle ayıruça iğtibarğa layıq, dip äytelde. Çönki soñğı yıllarda federal' xökümät urıs diasporası turında qayğırtunı bermä-ber arttırdı. Rossiä xökümäte parlament palataları çit il watandaşları belän eşläw buyınça maxsus strukturalar buldırdılar, alarğa yärdäm räweşendä byudjettan xätta aqçalata bulışalar.

III qorıltayda kütärelgän tağın ber mäsälä buyınça komissiä utırışında eşlekle fiker alışu buldı. Soñğı waqıtta törle töbäklärdä millättäşlärebezne etnik yaqtan qıyırsıtular, cäberläwlär küzätelä. Bötendönya tatar kongressı Başqama komitetı alarnı yaqlaw yözennän maxsus yuridik gruppalar oyıştırırğa niätlänä. Tatarstan buyınça keşe xoquqların yaqlawçı wäqälätle wäkil Räşit Wagızov Kongress törle xalıqara oyışmalarğa kerergä tieş digän fiker belderde. Komissiä utırışında 2003 yılğa eş planı raslandı.
XS
SM
MD
LG