8nçe mart xatın-qızlar köne yaqınlaşıp kilsä dä, Tatarstanda ağımdağı sotsial' tormış üzeneken itä. Grip awıruı Qazanda bik qatı dulağannan soñ, rayonnarğa, respublikanıñ keçeräk şähärlärenä yul aldı. Ä tabiplärneñ mäşäqäte bolay da az tügel. Soñğı yıllarda qanat cäygän eçkeçelek, narkomaniä belän köräşergä kiräk. Tatarstanda bu sotsial' bälägä qarşı küp çaralar kürelä. Döres, soñğı ber yılda narkomannarnıñ sanı kimräk terkälä başlağan. Narkomaniä belän köräşneñ täcribäsen iskä alıp, küräseñ, 7 ildän kilgän 500 belgeç qatnaşlığında konferensiä näq Qazanda ütkärelä. Düşämbe könne açılğan bu forumda Amerika, Fransiä, Argentina, Şveytsariä, Ukraina, Litva wäkillärennän başqa Rusiäneñ 19 töbägennän belgeçlär kilgän. 2000 yılda narkomannar sanı artu bigräk tä yuğarı templar belän sikergän ide. Rusiä Federatsiäsendä 481 meñ keşegä narkomaniä awıruı diagnozı quyılğan. Bu 100 meñ keşegä 334 narkoman turı kilä digän süz. Niçek ciñärgä bu afätne? Belgeçlär şul turıda söyläşä. Älbättä, tabiplärneñ proyektlarınnan başqa sotsial' häm iqtisadıy, gumanitar çaralar da qabul itelergä tieş.
