Kiev. Bar Ukraina buylap oyıştırılğan uram cıyınnarında qatnaşıp distälägän meñ keşe bügen prezident Leonid Kuçmanıñ urınınnan kitüwen taläp itte. Şuşı cıyınnar näq şundıy uq taläp belän ütkärelgän häm xakimiatneñ köç qullanuwına kitergän çaralarnıñ ike yıllığın bilgeläp oyıştırıldı. Ul çaqta cıyınnar öçen, prezident Kuçmanıñ, rişwätçelekkä qarşı köräşkän jurnalist Heorhi Gongadzene üterügä qatnaşı bar digän süzlär säbäp bulğan ide. Leonid Kuçma bu ğäyepläwlärne kire qağa. Bügenge çara isä xakimiatkä oppozitsiädä torğan kommunistlar, sotsialistlar, Yuliä Timoşenkonıñ reformaçıl xäräkäte tarafınnan oyıştırıldı, aña “Naşa Ukraina” berläşmäse dä quşıldı. Oppozitsiä prezident Kuçmanı häm anıñ tirälegen kiñ cäyelgän rişwätçelektä, xakimiatne üz faydasında qullanuda, qoral satuda häm tawış birü näticälären bozuda ğäyepli. Comğa könne Ukraina prezidentı 4 könlek säfär belän Slovakiägä kitte.
