11 mart yazuçı-dramaturg Äxmät Fäyzineñ tuuına 100 yıl tuldı. Äxmät Fäyzi tarixqa “Tuqay” romanı avtorı häm yazuçılar arasında berençe Tuqay büläge iäse bularaq, şulay uq berençe tatar operaları häm baletlarınıñ librettoları avtorı bularaq kerep qalğan. Şunısın da äytergä kiräk, şul Äxmät Fäyzi, Näcip Cihanov zamanınnan birle tatar operası, tatar baletı bik siräk küreneşkä äwerelde. Tatar opera häm balet teatrı tatarnıqı, yuqmı digän bäxäslär soñğı waqıtta bik aktual'. Häm menä bu ölkädä küptän kötelgän ber qazanış. Musa Cälil isemendäge teatrda “Qıssa Yosıf” baletın quyuçı törkeme 2002 yılda ädäbiät häm sänğät ölkäsendä Rusiäneñ däwlät premiäsenä täqdim itelgän. Älege baletnıñ librettosın zamandaşıbız Renat Xaris yazdı.
