…häm “Эфир” telekompaniäse

Başqa yañalıqlarğa kilgändä, Qazanda Näwrüz bäyräme matur ğına ütte. Andıy çaralar respublika rayonnarında, şähärlärendä dä ütkärelde. Televidenie tapşırularında iqtisat häm säyäsät iñ berençe urında. “Эфир” telekompaniäseneñ atnalıq analitik tapşıruında Zöfär Däwlätşin studiädä yanğınnan saqlanu qağidälären tupas räweştä bozdı. Ul Ğıraqqa höcüm itkän ilgä mönäsäbätne kürsätü öçen dollar, yäğni Amerika aqçasın küz aldında yandırıp, köllekkä taşladı. Yanğan aqçanıñ niçä dollar buluın kürsätmädelär. Ämma-läkin Zöfär Däwlätşinnıñ başlanğıçına iärep, aqça yandıruçı qazanlılar kürenmäde.

Şul uq “Эфир” kompaniäseneñ “Город” tapşıruın alıp baruçı Ayğöl Mirzayanova 10 yıl buyı yanğınnar, avtmombil' qazaları, keşe üterülär turında söyläp arığan ikän. Ul şuşı eşe öçen Rusiä televidenieseneñ iñ zur büläklären alsa da, “Город” tapşıruın taşlıy. Xäzer ul TV buyınça nindider zur proyekt yazğan, yä şul proyektnı ğämälgä quyu belän şöğellänä, yä deputat bulıp saylana ikän.

Milli yoldızlar xalıqnı sänğät belän şaqqatırmaqçı. Kamal teatrı 4 aprildä Başqortstanda gastrollär başlap cibärä. Şul uq köndä Ufada cırçı Salawatnıñ da çığışları başlana. İke säxnä törkemeneñ beryulı Başqortstanda çığış yasıy başlawı oçraqlıq buyınça kilep çıqqan ikän. Ämma Başqortstanda tatar teatrı häm estradasına qızıqsınu oçraqlı xäl tügel.

Rimzil Wäli, Qazan