Şulay uq, Däwlät Şurasında milli-mädäni mäsälälär komissiäsendä, tağın ber möhim mäsälä qaraldı. Optimalläşterü, çığımnarnı kimetü, ayırım alğanda awıl mäktäplären berläşterü, şifaxanälär sanın qısqartu, artıq mädäniät yortların beterü kampaniäse inde kitapxanälärgä dä kilep citte. Däwlät Şurasınıñ yöklämäse belän mädäniät ministrlığınıñ kitapxanälär bülege belgeçe Aqsubay, Qaybıç häm Yäşel Üzän rayonında tikşerü ütkärgän. Ul, utırışta çığış yasap, barı tik Qaybıç rayonında, barı tik 1 kitapxanäne yabıp bula, dide, qalğan ike rayonında artıq kitapxanälär yuq. Anda qısqartırğa mömkin bulğan eş urınnarın qısqartqannar inde, kitapxanäçelär eş säğätläreneñ yartısın alğannar. Rusiä Federatsiäse bilgelägän qağidälärdä, 500-dän alıp, 3000 meñgä qädär, keşe yäşägän urınğa 1 kitapxanä turı kilergä tieş, dielä. Ike awıl arasındağı ara 5 km dan zurraq ikän, ikesendä dä kitapxanä qalırğa tieş, ä azraq bulsa, xakimiätlär fikerençä, keşe kürşe awılğa barıp ta, kitap alıp qayta ala. Mädäniät ministrlığı belgeçe iğlan itkänçä, bu qısqartu kitapxanälär öçen birelä torğan aqçanıñ 2% ğına ekonomiäli. Ä mäktäp kitapxanäläre belän sanağanda, bu çara çığımnarnı ber yılğa 7 million sumğa ğına azaytırğa mömkinlek birä. Şulay itep, komissiä, xalıq ciela torğan, aralaşa torğan, yaña gäzit jurnallar belän tanışa torğan awıl kitapxanälären yapmasqa kiñäş itä, digän qarar qabul itte. Bu mäsälä kiläse plenar utırışqa da çığarılaçaq.
