Soñğı arada firqälär tormışı canlanıp kitte. Comğa kiç Qazannan Mäskäwgä ber törkem “Berdäm Rossiä”lelär üzläreneñ qorıltayına yul tottılar. İnde şik yuq: bu partiä ilneñ iñ yuğarı citäkçelek qanatı astında xäräkät itä. Küptän tügel Mäskäwdä uzğan kiñäşmädä “Berdäm Rossiä” liderlarına Vladimir Putin teläklär belän bergä tänqit süzlären dä yulladı. Äytergä kiräk, bu firqäğä kiläse yarışlarda Vladimir Putin avtoritetı yärdäm itär, ä menä xökümätneñ säyäsäte, kiresençä, yedinoroslarnıñ azğın qulın bäylär. Xäzergä sotsiologik tikşerenülär kommunistlarnıñ alda baruın kürsätä.
29 mart könne “Säfär” kunakxänäsendä ikençe ber firqäneñ, “Liberal' Rossiä”nıñ Tatarstan bülekçäseneñ konferensiäse uzaçaq. Anıñ teması: “İdel buyı federal' okrugında yäşäwçe xalıqlarnıñ problemaları.” Şunısı qızıq, bu çarada “Rossiäneñ milli politikası: bügengese, kiläçäge” digän temağa töp çığış yasawçı itep Boris Berezovskiy bilgelängän. Mäğlüm ki, şuşı könnärdä genä aña qarşı Rusiä prokuraturası tırışlığı belän “Логоваз” buyınça cinayät eşe quzğatılıp, şul säbäptän ul Londondağı xoquq saqlaw oyışmaları tarafınnan Böyek Britaniädän berqaya da kitmäskä tieşlege xaqında kisätelde. Xäyer, Berezovskiy çığışın Londondağı fatirında yasayaçaq, ä konferensiädä qatnaşuçılar “Säfär” kunakxänäsendä urnaştırılğan zur teleekran aşa tıñlayaçaqlar.
Ber-işe xäbärlärgä qarağanda, konferensiädä latinnı tıyu, federal' üzäkneñ töbäklärneñ kesälären äyländerä torğan salım säyäsäten tänqitläw kebek mäs'älälär kütäreläçäk.
Bu xaqta bez “Liberal' Rossiä”neñ säyäsi şura äğzası, anıñ Tatarstandağı bülekçäseneñ citäkçese Mars Şämsetdinovqa möräcäğät ittek. Häm anardan konferensiädä kütäreläçäk mäs’älälärne açıqlawın ütendek. Audio. M.Şämsetdinov Rusiäneñ milli säyäsäte zäğif, uylanıp beterelmägän, di. Konferensiädä süz tatarlar turında ğına tügel, İdel buyında yäşägän başqa xalıqlar mänfäğäten yaqlaw turında da baraçaq, dip äytä.
Moña östäp, şunı äytep bula: Boris Berezovskiy härdaim vlast'nıñ iñ neçkä cirennän eläkterergä tırışa. Milli säyäsät häm salımnar - bu Rusiäneñ töbäklär belän alıp barğan mönäsäbätlärneñ iñ borçulısı. Häm London qıñğırawı tikmägä genä yañğıramıy. Ul belä: töbäklärne üzäkkä qarşı quysañ – berençe çiratta Vladimir Putinnıñ abruyı töşäçäk.
