Amerikan xärbi köçläre bügen tağın 15 çaqrım alğa uzuları turında xäbär itä. Suğış bügen başqalanıñ iñ zur hawa alanı öçen bardı. Qatardağı üzäk xärbi idaräneñ matbuğat wäkile kapitan Frank Thorp, amerikan ğaskärläre kön sayın Bağdadqa yaqınlaşa, dip belderde. Hawa alanı yağında qatı şartlawlar turında xäbärlär bar. “Koalitsiä köçläre xäzerge waqıtta Bağdad hawa mäydanı yanında uñaylı ber waqıtta ciñügä ireşer öçen äzerlek alıp bara”, dide Thorp.
Amerikan xärbiläre wäkile kapitan Al-Lockwood, Umm Qasr şähäre Berläşkän Millätlär Oyışmasınıñ humanitar yardäme öçen imin, dip belderde. Şähär minalardan çistartılğan häm yardäm oyışmalar üz eşçänlegen biredä cäyelderä alaçaq.
Tönyaqta Mosul şähäre yulındağı Xazer şähäre yanında Körd suğışçıları häm Ğiraq ğaskärläre arasında bäreleşlär buldı digän xäbärlär bar. Körd köçlärenä hawadan koalitsiä oçqıçları yardäm itkän. Frans Press mäğlümat agentlığı xäbärçese birgän mäğlümatlärgä qarağanda atışlar berniçä säğat däwam itkän häm körd köçläre Xazer şähäre yanında qalğan.
Ğiraq mäğlümat ministrı al-Sahhaf bügen Amerikan ğaskärläreneñ alay uq alğa kitülären kire qağıp, bu xaqtağı xäbärlärne mänäsez dip atadı. Koalitsiä köçläreneñ Säddäm Hösäin hawa alanı öçen suğış alıp baruları turında, Al-Sahhaf, “…bu ber dä döres tügel häm xäbärneñ nigeze dä yuq. …Säddäm hawa alanı… Axmaqlıq bu.”, dide Al-Sahhaf.
Matbuğat oçraşuında jurnalistlar aldında Ğiraq mäğlümat ministrı, Amerikan xärbi köçläre qaydadır Bağdad yanında, dide, läkin alarnıñ ciñüläre turında söyläwläre, kiresençä, yuğaltular kiçerülären sizdermäs öçen genä, dip östäde Al-Sahhaf. Ğiraq wäkile süzlärenä qarağanda koalitsiä köçläre äle ber şähärne dä tulısınça üz kontrolenä almağan. Bügen Bağdadqa çäçelüçän bombalar atıldı, küp keşe häläk buldı, dide Al-Sahhaf. Anıñ bu mäğlümaten bäysez çığanaqlar älegä raslamağan.
Britaniä saqlanu ministrı Geoff Hoon, Londonda parlament aldında çığış yasap , Bağdadnı alu waqıtı älegä bilgesez, koalitsiä ğaskärläre aldında torğan awır eşne kimetep kürsätergä yaramıy, dide.
İran prezidentı Mohammäd Khattami, Ğiraqtağı suğış global extremismnı arttıraçaq, dip belderde. Ğiraqta barğan suğış tağın kübräk terror ğamälläre tudıraçaq, dide Khattami.
