Waqıtlı Ğiraq xakimiäte başlığı amerikan wäkile Jay Garner Kördlärneñ demokratik Ğiraq xökümäten tözüdä qatnaşaçağın wağdä itte. Kiçä Garner Körd citäkçese Jalal Talabani, bügen isä anıñ köndäşe tağın ber Körd yulbaşçısı Massoud Barzani belän oçraştı. Arbil şähärendä uzdırğan matbuğat oçraşuında Garner-Amerika Quşma Ştatları Ğiraqqa üz xökümäten tözergä yardäm itergä teli, dide.
“Bezneñ mondağı maqsatıbız-Ğiraqta yaña möhit tudıru –demokratik möhittä Ğiraq xalqı üz citäkçelären häm üze telägän xökümäten saylıyaçaq. Näticädä-Ğiraq xalqı üze irekle saylağan xökümätkä iä bulaçaq”, dide Garner.
Ğiraq xalqınıñ 60%tın täşkil itkän şiği möselmannarınıñ 1 millionğa yaqın wäkile izge Kerbala şähärenä xac qıldı. 3 meñgä yaqın keşe Quşma Ştatları tarafınnan köçläp tağılğan xakimiätkä qarşılıq belderep uramnarğa çıqtı. Kerbalağa xac Säddäm Hösäin çorında tıyılğan ide.
Ğiraqqa Britaniä Saqlanu Ministrı Geoff Hoon kilde. Suğış tämamlanğannan birle Hoon-Ğiraqqa kilgän berençe yuğarı däräcädäge amerikan yä britan wäkile buldı. Bağdadnıñ Amerikan ğaskärläre citäkçlegendäge koalitsiä köçläre kontrolenä küçkännän ike atna waqıt uzsa da, elekke Ğiraq citäkçese Säddäm Hösäinneñ qayda bulğanı mäğlüm tügel.
Berläşkän Millätlär Oyışması, Ğiraq xalqı açlıq kürmiäçäk, dip belderde. Dönya Azıq-tölek programmasınıñ başqarma direktorı James Morris, ildä açlıq buldırmasqa oyışmanıñ qüäte citäçäk, dide. 3 ay öçen bu oyışma tarixtağı iñ zur humanitar yardäm bülep birä-1 million dollarlıq. Älege waqıtta Ğiraqnıñ 24 millionlıq xalqında äle berniçä atnalıq azıq-tölege bar. Suğışqa qadär xalıqnıñ 60%tı Beläşkän Millätlär Oyışmasınıñ neftke-azıq-tölek programması xisabına yäşäde. Programma suğış başlanğaç ğamäldän çığarılğan ide.
