200gä yaqın Ğiraq wäkile bügen Bağdadta oçraşıp yaña Ğiraq xakimiäte turında söyläşte. Utırışnı Ğiraqta waqıtlı idarä başlığı itep bilgelängän amerikan wäkile Jay Garner alıp bardı. Söyläşüdä Ahmad Şalabi’nıñ Ğiraq Milli Kongressı wäkilläre, İranda urnaşqan Ğiraq Şiği Möselmannarı törkeme räsmiläre häm Ğiraqta İslam Revolyutsiäseneñ Yuğarı Şurası äğzaläre qatnaştı.
Amerikan Saqlanu Ministrı Donald Rumsfeld Farsı Qultığı däwlätläre buylap säfären däwam itä. Bügen Quşma Ştatlar ministrı Qatar häm Bahrainda tuqtaldı. Amerikan köçläreneñ Qatardağı xärbi bazasında Rumsfeld ğaskärlärne Ğiraq xökümäten bärep töşerüläre belän qotladı, general Tommy Franks belän oçraştı. Al-Jazeera televideniä kanalına birgän äñgämäsendä Rumsfeld, Amerika Quşma Ştatlarnıñ Ğiraqta xärbi bazalar tözergä niäte yuq, dide.
Bügen Britaniä başqalasında matbuğat oçraşuında premyer-ministr Tony Blair, Ğiraqta küpläp üterü qoralı buluında şiklänmäwen häm anıñ tabılaçağın belderde. Läkin monıñ öçen Ğiraqqa Berläşkän Millätlär Oyışmasınıñ qoral inspektorları qaytırmı-yäisä qorallarnı başqa keşelär ezlärme-bu xaqta Blair äle söyläşäse bar, dide. Koalitsiä köçläre İran citäkçelege belän bulaçaq Ğiraq xökümäte turında söyläşülär alıp bara.
