Accessibility links

Кайнар хәбәр

May başında nilär kötelä?


1 May eşçelär sıynıfınıñ sotsial' köräşe bäyräme bulsa da, kapitalizmğa basqan Rusiädä zurlap ütkärelä. Çönki may başı, yaz başı bäyrämsez bula almıy. Ğomumän, 10 mayğa qädär yal häm bäyräm itü däwam itäçäk. 1 May - Xezmät häm yaz bäyräme belän tatarstanlılarnı premyer-ministr Röstäm Miñnexanov räsmi räweştä täbrik itte. Dimäk, bu bäyrämneñ däräcäse näq ikençe kategoriä bulıp çığa. Tübän tügel bu däräcä. Profsoyuzlar irtänge säğät 9da uq İrek mäydanına cıyılalar, ä 10da Üzäk park yanında miting başlana. Anıñ töp şiğare: “Sotsial' däwlätkä - köçle sotsial' säyäsät”. Mitingtan soñ üzeşçän artistlarnıñ konsertı bulaçaq. Älbättä, kommunistlar konsert belän genä qänäğätlänmäs. “Единая Россия” firqäse dä irtük torıp demonstratsiägä çığa. Alarnıñ şiğarläre: “Köçle Rusiä- berdäm Rusiä”, “Bay il – berdäm xalıq”, “Bezneñ ideologiä – xalıqnıñ layıqlı tormışı“. Yäğni, bu bäyräm häm sıynfi köräş demonstratsiäse saylaw aldı köräşen iskä töşeräçäk.

May başında başqa çaralar da ütkäreläçäk. 9 May Ciñü köne bıyıl da zurlap ütkärelä. Xäzer Tatarstanda suğış veterannarı küp tügel. Şuña kürä alarğa xörmät kürsäteläçäk, büläklär bireläçäk. Bäyräm könne buşlay soldat botqası awız itep, 100г kütärü mömkinlege dä bulaçaq. Qazan xakimiäte citäkçeläre çärşämbe könne brifing ütkärep, bıyılğı Ciñü bäyrämenä äzerlek turında bäynä-bäynä söylädelär. Veterannarğa taşlamalar härwaqıt bäxäs uyata. Kemgä nindi uñaylılıqlar häm posobielär birelgänen küpçelek belmi ikän. Äytik, veterannardan telefon bäyäse yartılaş qına tülätelä. Ä xäzer telefon kompaniäläre küp. Xosusıy firmalar veterannarğa tüläwne kimetsä, zıyan kürälär. Şähär xakimiäte wäkile Tatyana Larionova äytüençä, küpçelek kompaniälär veterannarğa taşlama birergä riza ikän, barı tik ber genä firma, “Teleset” dip atalğanı ölkännärdän yartılaş tülätügä rizalaşmıy ikän. Yäğni, “Teleset” qaramağındağı yortlardağı veterannar yartılaş qına telefon bäyäsen tülämi. Menä şundıy reklama birelde. Bäyräm könnärendä, yäğni 1,2,3,4 häm xätta qayberäwlär öçen 5 dä yal köne bulaçaq.

5 mayda Fännär akademiäseneñ Tarix institutı häm “Ruxiät” fondı, Bötendönya tatar kongressınıñ Başqarma komitetı “Tatar xalqınıñ borınğı tarixı” digän kitabın täqdim itä. Tatar kongressı binasında ütäçäk älege çarada Mintimer Şäymiev ta qatnaşırğa cıyına. Dimäk, millät häm tarix turında soñğı waqıtta onıtıla başlağan süzlär yañğırarğa mömkin.
XS
SM
MD
LG