9 yün kiçendä Qazan milli-mädäni üzägendä şähär xakimiäte başlığı Kamil İsxakov matbuğat oçraşuı ütkärde. Ul başta uq, jurnalistlarğa sağınıp kilgänen, ozaqlap söyläşergä niätläwen äytte. Şunnan soñ ozaqlap Qazan Sabantuyınıñ 21 yündä ütkäreläsen, Rusiädä bu kön eş köne itep iğlan itelsä dä, şähär xalqı öçen monıñ problema bulmawın añlattı. Jurnalistlar da sorawlarnı şul uq ruxta, äliftän başlap birä başladı. “Sezneñ öçen Sabantuynıñ ruxi, mädäni qimmäte?” digän sorawğa Kamil İsxakov ulı bolay cawap birde:
AUDİO. ... yäğni Sabantuyı Tatarstanda da, tatarlar yäşägän yıraq illärdä dä millätara, xätta, xalıqara bäyrämgä äwerelgän. Şuña kürä dä Sabantuyın UNESCO mädäni mirası isemlegenä kertüdä qıyınlıqlar bulmas.
Qazan başlığı fikerençä, bu mäs'älä UNESCOnıñ oktäber ayında uzaçaq global' cıyılışında xäl iteläçäk. Moña dälil itep ul kürgännärennän ber qızıqlı fakt kiterde. Morokkoda ber mäydanğa xalıq cıyılıp, fol'klor yolalar ütkärä ikän. Menä şuşı mäydan dönyanıñ mädäni mirası itep UNESCO isemlegenä kertelgän. Kamil İsxakov jurnalistlarnıñ qatlawlı, çeterekle sorawlarına da äytkändäy üz itep, ğadi genä cawap birde. “İkona Boj'yey Materi Qazanğa qaytarılırmı-yuqmı?” digän sorawğa ul bolay cawap birde. “... yäğni bu protsess bara, läkin Patriarx Aleksiy II awıruı säbäple beraz totqarlana. Patriarx: “Kamil, bar Vatikanğa, alıp qayt ikonanı, min alqışlar belän qarşılarmın” dip xäyer-fatixasın birgän inde. Äle Rim Papası da Mongoliädän qaytışlıy, Qazanğa kerü niätennän waz kiçmägän di. Qazan başlığınıñ Peterburnıñ 300 yıllığı tantanalarınnan alğan tä'sirläre dä üzençälekle ikän. Kamil Şamil ulı Peterbur küñelsez, yamansu şähär di. Qazan yärdäme itep ber uramdağı binalarnı tözätergä, yañartırğa totınğannar. Bina fasadların Qazança itep aq, açıq töslärgä bui başlağaç, bu bezneñ stil' tügel dip tıyğannar. Sıqrana-sıqrana, aq buyaularıbızğa qorım quşarğa turı kilde, dide Kamil İsxakov. Xäyer, Qazannıñ 1000-yıllığına äzerlek eşläre dä bik ük küñelle barmıy ikän. Çönki Mäskäw Qazannıñ 1000-yıllığına bağışlanğan maqsatlı federal' programmanı 25% ğına finanslıy ikän.Yunıs Ätnäle, Qazan
