Accessibility links

Кайнар хәбәр

Ministrlar Kabinetında elemtä häm tözeleş mäs’älälärenä bağışlangan brifing uzdı...


Ministrlar Kabinetınıñ sişämbe brifingı elemtä häm tözeleş mäs’älälärenä bağışlandı. Elemtä ministrı Rinat Zalyalov brifingqa cıyılğan jurnalistlarğa “kollegalarım, yäğni xezmättäşlärem”, dip möräcäğät itte. Çönki jurnalistlarsız nindi mäğlümat çarası di dä, elemtäsez nindi mäğlümat çarası di?

Elemtä ministrı süzne jurnalistlarnı iñ qızıqsındırğan temadan başladı. “Tatarstan yaña ğasır” tele-radio kanalı tapşıruları respublika xalqınıñ 90% ireşterelgän. Läkin bu yünäleştä äle ike yıllıq eş bar. Tağın 47 retranslyator tözise bar. Moña 2003 yılğa respublika byudjetınnan telefon elemtäse programmasın finanslaw xisabına 60 million rubl' birelgän. Telefonlaştıru programması xarap bulğan ikän dip uylamağız tağı. Awılnı telefonlaştıru, ministr süzlärençä 98,8% citkän. Zamança texnologiälär üzläşterüdä qazanışlar bar. Tatarstanda 50 İnternet-provayder eşli, İnternet qullanuçılar sanı 160 meñ. Bu san yıl sayın 2-3 tapqır arta.

Tatarstan elemtäçeläreneñ soñğı qazanışı - mäğlümat tapşırunıñ respublika däwlät multiservis çeltären oyıştıru. Mäğlüm ki, 2nçe yündä älege çeltärne täqdir itü buldı. Respublika citäkçelege Qazannan rayon başlıqları belän turıdan-turı video-elemtägä çıqtı. Elemtä tarmağında nindi problemalar bar soñ? Problemalarnıñ berse itep jurnalistlar çıbıqlı radionıñ yuqqa çığa baruın quydılar. Rinat Zalyalov çıbıqlı telefon artta qalğan tarmaq bularaq ğämäldän çığa bara, di. Mondıy radio qullanuçılar öçen Elemtä ministrlığı UKD radioalğıçlar satu oyıştıra. Bäyäläre 100-150 sum. Elemtäçelärneñ tağın ber artta qalğan tarmağı - poçta elemtäse. Poçta elemtäse äle dä 90-yıllar başında tuğan wäzğıättän, krizistan çığa almıy. Tatarstannan çittä yäşäwçe millättäşlärebez öçen respublika matbuğatı äle tağın berniqädär tansıq äyber bulıp qalır. Xäyer, xäzerge zamanda xat yazışa almasañ, qärdäşlären yanına barıp kilü dä, äytkändäy, ike tien ber kömeş.

Yunıs Ätnäle, Qazan.

XS
SM
MD
LG