18 yün, çärşämbe könne, Qazan milli-mädäni üzägendä ber qızıqlı çara uzdı. Anda tanılğan rässäm, Qazaqstanda yäşägän häm icat itkän Bäxtiyar Tabievnıñ Dala moñı dip isemlängän şäxsi kürgäzmäse açıldı. Älege kürgäzmäne Bötendönya tatar kongressı oyıştırdı. Qısqaça ğına rässämneñ üze, anıñ qızıqlı tormış yulı belän tanıştırıp kitäbez. Bäxtiyar Tabiev 1940 yılda Qıtaynıñ Gölca şähärendä tuıp üsä, 15 yäşendä ul ğailäse belän Qazaqstanğa küçenä. Anıñ näsele Räzän ölkäsennän yul ala. Bu xaqta üzeneñ çığışında Tatar kongressı Başqarma komitetı räise Rinat Zakirov söyläde. Şulay itep, ğömer buyı Tatarstannan çit cirlärdä yäşäsä dä, Bäxtiyar berqayçan da üzeneñ milläten, tamırların onıtmağan, tatar mädäniäten, tarixın öyrängän. Anıñ icatında bu bik açıq çağıla. Şuña da, älege rässämneñ icatı Qazanda ayıruça zur qızıqsınu uyattı. Bu xaqta kürgäzmäne açu tantanasında da äytelde. Tatarstannıñ Däwlät Şurası räise urınbasarı Robert Miñnullin üzeneñ çığışında menä närsälär äytte.
Bäxtiyar Tabiev – bik talantlı rässäm, anıñ räsemnäre Qazaqstanda ğına tügel, ä böten dönyada bilgele. Qazaqstannı, anıñ tabiğäten, dalaların bik yaratıp, icatınıñ küp kenä öleşen alarğa bağışlasa da, ul tatar dönyası belän dä elemtäsen özmi. Min anı qazaq rässäme genä tügel, ä tatar, ğömümän, törki rässam dip äyter idem.
Kürgäzmäne açuda Bäxtiyar Tabievnıñ tormış iptäşe Viktoriä xanım häm alarnıñ balaları – Saidä belän Azat ta qatnaştılar. Şulay itep, rässäm Bäxtiyar Tabievnıñ kürgäzmäse Qazanda bik matur itep açıldı, anda kilüçelär dä cılı süzlär äyttelär. Läkin rässämneñ ğına bu çarağa qädär yäşi almawı bik ayanıç. Xäyer, soñ bulsa da, andıy keşelärne, alarnıñ icatların onıtmaw, ömetle küreneş. Açıluda tağın ber çığış yasawçı – yazuçı Räbit Batulla, tatarnıñ üz millätenä xezmät itä almağanda, başqa millätkä dä şulay uq tuğrılıqlı itep xezmät itüçe ulları küp, dide. Alarnı da onıtmasqa ide.Gölnaz İlgizär, Azatlıq radiosı, Qazan
