Bıyılğı Tatar yäşläre könnäreneñ iñ zur yañalığı şunda – alar «İdel» lagerendä tügel, ä teploxodta ütä. Tağın ber üzençälek - yäşlär Qazanda ğına tügel, Çallı, Alabuğa, Çistay şähärlärendä dä bulaçaq. 5 könlek säyäxät programmasında Body-Art bäygelärennän başlap, milli problemalarğa qağılışlı tügäräk öställärgä qädär qaralğan. Tatar yäşläre könnäre 6nçe iyüldä başlanıp, 10sında tämamlana.
Berençe könne, yäşlär teploxodqa utırıp, şähär yılğa portınnan quzğalıp kitäçäk. Şul uq könne Tatar yäşläre könnäreneñ tantanalı açılışı da bula. Yözü barışında, korabta, psixologik uyınnar uzdırılaçaq, şäriğätçä yäşäw räweşe, tatar internetı klubı turında söyläşülär bulaçaq. Şunda uq, tändä räsem yasaw bäygeläre häm çit töbäktäge tatar oyışmalarnıñ eşläw täcribäse belän tanışu da küz aldında totıla. Şulay uq, tatar yäşläreneñ Çallıda tuqtap, andağı tatar yäşläre belän tanışuı da planlaştırılğan. Bügenge köndä yäşlär forumına kilüçelärneñ isemlege oyışıp kilä, tatar yäşlär oyışmalarınnan ğarizalarnı qabul itü tämamlanıp kilä. Oyıştıru mäs’äläläre xaqında, yäşlär eşläre ministrlığınıñ «İdel» üzäge xezmätkäre Marat Äsätov belän söyläşep aldıq.
Marat Äsätov:Bez ber 50-läp töbäkkä çaqıru cibärdek. Ber 30 tatar oyışma wäkile kilergä teläk belderde. Alar arasında Rusiä töbäklärennän dä, BDB illärenän dä kilüçelär bar. Mäsälän Azerbäycannan, Vladikovkazdan, Kabar-balkar respublikasınnan, Omskiydan, Orenburdan, Samaradan qunaqlar bulaçaq. Bıyılğı tatar yäşläre könnäre öçen Bötendönya tatar kongressı başqarma komitetı 200 meñ bülep birde, yäşlär eşläre ministrlığı da şul külämdäge birer dip kötelä. Başqa fondlarda da yädräm bulırğa mömkin. Teploxodta bulğaç, byudjetı da, aldağı yıllar belän çağıştırğanda, zurraq bula inde.
Soñğı berniçä yılda bulğan tatar yäşläre könnäre turında yazğanda, matbuğatta, «urıs telle tatar yäşläre cienı», dip zarlanuçılar buldı. Bıyılğısı niçek bulır, äle bilgele tügel. Tatar yäşläre könnären tänqitläwçelär arasında, yäşlärne, Qazan buylap taralmasın öçen, teploxodta ciarğa bulğannar, dip äytüçelär dä buldı. Annan soñ, tatar yäşläre könnärenä çaqırılmağan Qazan qunaqlarınıñ da, bıyıl, çittäge millättäşläre belän aralaşu mömkinlege bulmayaçaq. Bu da üzenä kürä 14nçe tatar yäşläre könnäreneñ yañalığı.
Ütkän yılnı tatar yäşläre kongressı ütkäreläçäk, digän süzlärne yış işetergä turı kilde, ul cien uzğan cäydä dä bulmadı, bıyılğısında da uzdırılmas inde. Bügen isä ber tatar yäşläre oyışması wäkile, Bötendönya tatar kongressı räise belän tözelgän kileşügä sıltap, yäşlär kongressınıñ kiläse yılğa planlaştırıluı turında xäbär itte. Bu xaqta häm 14nçe tatar yäşläre könnärneñ barışı turında bezneñ aldağı tapşırularıbızda xäbär itärbez.
Bikä Timerova, Qazan.
