Accessibility links

Кайнар хәбәр

Yaña bistä ziratında wäxşilekme, xuliganlıqmı?


24 yün Tatarstan mäglümät çaraları tatar cämäğätçelege öçen küñelsez xäbärlär kiterde.Sişämbe gazetaları İmam Gıymaev wafatına nekrolog bastırıp çığardılar. İmam Gıymaev ğömereneñ küp öleşen Çistay rayonına bağışladı. 40 yılğa yaqın Çistay araqı zavodın citäkläde häm anıñ danın Rusiä däräcäsenä kütärde. Şunısı qızğanıç Watan suğışın baştan ayaq uzğan 85 yäşenä citkän veteran, suğış başlanğan köngä,matäm könenä qarşı töndä wafat buldı. 22 iyün matäm könenä qarşı töndä Qazanda tağın da küñelsez xällär buluı turında xäbärlär buldı. Düşämbe könne öylä waqıtında İntertat.ru-“ Yaña bistä tatar ziratın 22 iyüngä qarşı töndä bilgesez wäxşilär mäsxärälägännär”- digän xäbär birde. Xäbär birüçelär küräsen tatar ziratı bulğaç anda möselmannar ğına cirlänä digän mantıyqtan çıqmıyça ğına, xäbärne “möselman qäberleklärendäge taşlarnıñ qayberlären wäxşilär- audarğannar, qayberlären watqannar”- dip birdelär. Tatarstan yaña ğasır televideniese kiçke xäbärläreneñ berençe çığarılışında älege xäbärne tükmi-çäçmi uqıp birde. Xäbär qabatlanğannan soñ berär säğättän, Yaña bistä ziratına barıp cittek. Administratsiä binasında eşlilär ide äle. Çista-pöxtä kiengän ber yeget-“ administratsiä başlığı yuq, sezne närsä qızıqsındıra”- dide. Xäbär eçtälegen qısqaça söyläp birgäç-“ şäxsän andıy xäl turında işetkänem yuq, ziratqa keregez, qarağız röxsät“- dide. Kerdek. Barabız, şöbhälänep, üzäk alleyadan. Läkin şöbhälänerlek bernärsädä kürmibez. Ğomumän ziratta moñınça kürelmägän tärtip, tözeklek häm çistalıq. Ber tatar ğailäsen oçratabız. İşettegezme şundıy-şundıy xällär turında. Yuq. Menä alleya buylap urnaşqan kürenekle tatar zıyalıları qäberläre belän ber rättän rus, yähüd, çegän qäberläre. Xättä avtomobilläre belän bergä märmärdä çoqıp surätlängän 18-20 yäşlek yegetlär qäberläre. İnde berniçä märtäbä “närsäsender borıp alıp kitkännär“- digän imeş-mimeş çığarılğan İskändär Bigiçevneñ qäber taşı, çarduğanı yıraqtan yalt itep balqıp tora. Ziratta eşläp yörüçedän sorıybız. Yuq, andıy xällär turında, işetmägän. Läkin öç telekanal törkeme kilep soraşıp, ezlänep kitkännären belä. Şulay itep zirat administratsiäse älege xälne yomıp qalırğa, bik taratmasqa telägäne sizelä. Çönki qayber mäğlümat çaralarınıñ waqiğadan sensatsiä yasarğa beläwläre belensä dä öleşçä monda xaqiqät bar. Töpleräk mäğlümat çaraları Qazannıñ İdel buyı rayonı eçke eşlär idäräse Yaña bistä ziratında xuliganlıq faktı oçrağına cinayät eşe quzğatqan. Versiä xäzergä mondıy. 22 iyüngä qarşı töndä Yaña bistä ziratı aşa uzıp çıqqanda, ber törkem yäşlär , uzıp barışlıy ğına qul astına eläkkän qäber taşların audarğalap barğannar. Zirat qarawılı monı sizmi qalğan. Şuña kürä zirat administratsiäse şaw-şu kütärmäw yağında. Qäberlär şul köne- säğäte belän tözätelgän. Ä cäncal yaratuçı kommersiäläşkän mäğlümat çaraları wazğıatne quyırtırğa çamalıylar. Xäyer xalıq äytkändäy-“ eşe yuq närsäsennän, närsä ezlägännärgä” awışmıyça başqa räsmi xäbärlärgä küçik. Düşämbe könne Ministrlar kabinetı utırışı buldı. Kön tärtibendäge berençe mäs'älä-Tatarstan wäkilçelekläreneñ eşçänlegen yaxşırtu. Ministrlar kabinetı utırışınıñ ikençe öleşe awıl xucalığı kadrları äzerläw problemasına bağışlandı. Awıl cirendä yäşäwçe tıñlawçılarıbız-“ nindi problema uylap taptığız tağın. Awıl tulı tipsä timer özärlek, öylänmägän yegetlär eşsez yatalar”- diärlär. Sez xaqlı xörmätle tıñlawçılarıbız. Läkin süz yuğarı belemle belgeçlär turında bara. Älege utırışta Premyer-ministr Röstäm Minnexanov problemanı bik ğadi itep açıp saldı. Şähärdäge yuğarı uqu yortlarına awıl yäşläreneñ yaxşı uqığannarı, yä ata-anası xälle bulğannarı ğına saylanıp alına. Premyer-ministr yuğarı uqu yortlarına awılda ni uqırğa, ni eşlärgä urnaşa almağan yäşlärne tartıp- suzıp, imtixannarnı öçlegä bulsa da birä alğannarın da qabul itärgä täqdim kertte.

Yunıs Ätnäle.

XS
SM
MD
LG