Accessibility links

Uzğan yal könnärendä Tatarstanda bulğan iñ möhim waqiğalar...


İdel buyı töbäkläre üseşe forumınıñ qayber yomğaqları, Rusiä ministrı Vladimir Zorinnıñ Qazanda bulıp kitüe turında mäğlümat häm keçkenä äñgämä, Mäskäwdä Tuşino hawa mäydanında ütkärelgän konsertta tatarlar da buluı turında mäğlümat, Bötendönya tatar kongressı Başqarma komitetı räise Rinat Zaqirovnıñ Mäskäw sabantuyı häm Başqortstan tatarlarınıñ uzğan şimbädä ütkän qorıltayı turında fikerläre.

Berençe urında, älbättä, töbäklärne köndäşlekkä sälätle itep üsterü turındağı forum yomğaqları.Älegäçä barlıq tügäräk öställär, utırışlar, qabul itkän qararlarnıñ basılıp çıqqanı yuq. Ämma, forum qarşılıqlı fikerlär yañğıratıp bulsa da, İdel buyı töbägendä häm Rusiädä barğan protsesslarğa uñay tä'sir yasıy, digän näticä bar. Xätta barlıq oçraşularnıñ häm çığışlarnıñ tögäl isemlege dä tözelmägän. Küp, bik küp buldı alar. Ata-ulnı, ana qıznı işetmäslek iqtisadi-säyäsi fikerlär bazarı buldı ul. İñ möhime, eşquarlar häm idaräçelär, xakimiat häm cämäğätçelek küñelendä nilär yatqanın yaxşıraq belü mömkinlege tudı. Forumnıñ berençe köne axırında Piramida tamaşalar zalında Tatarstan prezidentı isemennän qabul itü iñ qızıqlı mizgel bulıp sanala. 300-400 saylap alınğan qunaq, Piramida zallarında quyılğan östäl artında sıylanıp, räsmi citäkçelärneñ häm artistlarnıñ çığışların tıñlap, qarap utırdı. Oligarxlar belän çinovniklar, jurnalistlar belän gubernatorlar häm prezidentlar ber qazannan aşap, ber ük fikerlärne törleçä ğäyre-räsmi şartlarda yañğırattılar. Mondıy oçraşularnıñ häm mäcleslärneñ mäğnäse protokolda tügel, ä küñeldä qala.

Bezneñ tapşırularıbızda Mintimer Şäymiev häm qayber başqa räsmi zatlar Zur İdel assotsiatsiäsen tarqatırğa täqdim itte, digän fiker yañğıradı. Tögälräk äytkändä, Zur İdel assotsiatsiaseneng näticälege tübän, anıñ täqdimnärenä häm qararlarına xaqimiat qolaq salırğa tieş, digän fiker yañğırağan ide. Saratov gubernatorı Dmitriy Ayatskov, eşlär bolay barsa, min bu assotsiatsiädän bötenläy çığıp kitärmen axırı, dide. Ämma, bu işeksez oyışmadan kerü-çığu ciñel tügel. Şunlıqtan anıñ Qazandağı utırışı eşlekle genä ütep kitkän. Moña qädär Zur İdelneñ prezidentı bulıp yörgän Niqolay Merquşkinnıñ sroğı çığu säbäple, älege urınğa Penza ölkäse gubernatorı Vasiliy Boçkarev saylanğan. Dimäk, Zur İdel assotsiatsiäse bar, aña kerüçe ölkälärneñ sanı İdel buyı federal' okruğına kerüçe töbäklär sanına täñgäl kilmi. Mäsälän, Ästerxan, Volgograd ölkäläre Könyaq federal' okrugqa kersä dä, Zur İdel assotsiatsiäsendä dä qatnaşa.

Ä xäzer – forumnıñ soñğı könendä Qazanğa kilep töşkän Rusiäneñ Millätlär ministrı Vladimir Zorinnıñ Qazanda buluı turında Yunıs Ätnäle yazmasın tıñlıyq.

AUDİO

İşetüegezçä, bu kilüendä Vladimir Zorin fänni cıyılışlarda da qatnaşqan, prezident, xökümät citäkçeläre, cämäğätçelek belän oçraşqan. Yış qına Qazanda tänqit utına totılğan Zorin, bu yulı Rusiäneñ milli konsepsiäsen üzgärtü öçen töple täqdimnär cıyu belän şöğellände häm bu eştä zur ğına uñışqa ireşte.

Düşämbe könne Tatarstan premyer-ministrı Röstäm Miñnexanow säfärgä çığıp kitte. Ul Ameriqa Quşma ştatlarınıñ Kolorado ştatı belän iqtisadi xezmättäşlekne kiñäytü belän şöğıllänäçäk. Kolorado digän süzne bezneñ xalıq bäräñge baqçasına bäyläp qarıy. Läkin bu yulı Kolorado qurqınıç tügel, ä fayda kiterä torğan töbäk iseme.

İnde uzğan şimbädäge ike waqiğağa äylänep qaytıyq. Mäskäwdä bulğan Sabantuyı häm Ufada ütkän tatar cıyılışı. Sabantuyı könne Tuşino oçqıç mäydanında şartlaw bulıp, anda keşelär häläk buluı şähärdäge bäyräm ruxın üzgärtteme ikän? Qazannan Mäskäwgä baruçılar moña niçek qarıy? Bikä Timerovanıñ şul turıda xäbären tıñlıybız.

AUDİO

Xäbärebezneñ soñğı öleşendä Bötendönya tatar kongressı Başqarma komitetı räise Rinat Zakirov comğa häm şimbä könnärendä Mäskäwdä buluı turında söyli.

AUDİO

Ä xäzer Tatar kongressı citäkçeseneñ Tatarlar qorıltayı turındağı fikeren işetteräbez. Eş şunda ki, yäkşämbe tapşıruında Başqortstan tatarları kongressı citäkçese Eduard Xämitov şul syezda Qazannan häm Bötendönya tatar kongresınnan wäkillär qatnaşmawın üzençä añlatqan ide. Anıñ fikerençä, Qazannan häm kongresstan Ufa qorıltayına kilsälär dä yaxşı bulır ide. Rinat Zakirov Azatlıq radiosınıñ Qazan byurosında menä närsälär söyläde.

AUDİO

Sez Bötendönya tatar kongressı Başqarma komitetı räise Rinat Zaqirovnıñ Ufada ütkän tatar qorıltayı turında fikerlären işettegez. Düşämbe könne Qazanda Ufada ütkän qorıltaynıñ qayber delegatları Qazanğa kilep, etnologik tikşerenülär üzägendä jurnalistlar belän oçraştı. Süz şul uq şimbädä tınıç qına ütkän qorıltay turında. Anıñ yomğaqları xäzergä ällä ni tınıç bulıp kürenmi. Şunıñ belän Tatarstan xäbärläre tämam.

Qazan byurosında äzerlängän tuplanmanı Rimzil Wäli alıp bardı.
XS
SM
MD
LG