Şawlap-görläp yämle sabantuyları da ütep kitte. Ural cirendä alar ğädättä may axırınnan alıp iyül başlarına qädär däwam itä. Şunısı üzençälekle, qayber rayonnarda sabantuyları berniçä törgä bülenä: yazğı çäçü betkäç oyıştırıla torğan ğädäti bäyrämnärdän tış, may axırında, mäktäplärdä uqular tämamlanğan çorda balalar sabantuyı, ä inde iyül başlarında, cäyge çellä waqıtında peçän öste başlanır aldınnan kiçke sabantuylar uzdırıla. Bu bigräk tä tatarlar tuplanıp yäşägän Tübän Sirgä häm Äрtä rayonnarında şulay. Küptän tügel Sverdlov ölkäseneñ Ärtä rayonında şundıy matur bäyrämnärneñ berse uzdırıldı. Anı rayonnıñ iñ aldınğı xucalıqlarınıñ berse – Man''çaj xucalığı citäkçeläre oyıştırdı.
Şunısı qızıqlı, Man''çaj – rus awılı. Yaqın-tirädä Tornawıl, Bitken, Baqi, Äceğol kebek tatar awılları urnaşqan. Ber ğailädäy dus, tatu bulıp yäşilär biredä törle millät keşeläre. Ber xucalıqta eşlilär, berdäy bulıp bäyräm itälär.
Yämle Ufa yılğası buyında uzdırılğan bu yılğı bäyrämne “Man''çaj tañnarı” dip atadılar. Kiçqırın, eşlär betü belän, bar xalıq yılğa yarına, bäyrämgä aşıqtı. Säxnädä – Yekaterinburg häm Tübän Tagil şähärlärennän maxsus çaqırtılıp kiterelgän sänğät ostaları. Tatar, mari, rus tellärendä moñlı matur cırlar, därtle iyüllär. Yazğı eşlärdä ayıruça zur kürsätkeçlärgä ireşkän qır batırların büläkläw. Kütärenke bäyräm ruxı. Bolarnıñ barısına tağın da maturraq bizäklär östäp, awıl xezmätçännären sälämläp, tönge säğät 12 dä yaqın-tiräne uratıp alğan taw bitlärendä häm yılğa östendä äzerlänep quyılğan sal öslärendä dan uçaqları qabındı. Yaqtı uçaqlar yanıp torğan sallarnı ağızu üze ber tamaşa buldı.Bäyräm irtängä qädär taw bitendäge uçaqlar tiräsendä däwam itte. Uyın-kölke, şaw-gör tañğa qädär tınmadı.
Fäwiä Safiullina, Yekaterinburg
