Accessibility links

Кайнар хәбәр

Törkiädä yal itü - "Awlaq öy"neñ Märmäristäge dustı xäbär itä...


Qäderle duslar, sawmısız! "Awlaq öy"neñ çirattağı utırmasına räxim itegez! İnde menä awgust ayı azağına yaqınlaşıp kilä, ildä äle genä 1991-nçe yılğı mäğlüm fetnä häm 1998-neñ şulay uq yaxşı defoltınıñ çirattağı yıllıqların bilgeläp üttelär, Tatarstan 30-nçı avgustta Möstäqillek könen bäyräm itärgä cıyına. Dimäk cäy ayları azağına yaqınlaşa, cäyge yal waqıtı ütep bara digän süz. Anı törlegez törleçä ütkärgänder inde, kem Aznaqayda, peçän çabıp, kem Anapada, ä kem Costa Bravada, xäzer mömkinleklär kiñ, kesägä qarap, älbättä. Bügenge "Awlaq öy"dä bez Törkiädä yal itügä küz salırğa buldıq.

Ser tügel, tuğandaş häm Qazannan wä Ufadan, başqa cirlär belän çağıştırğanda ällä ni yıraq ta yatmağan törek cire soñğı yıllarda bik yaratqan urınnarnıñ bersenä äylände. Anda xäzer arzan mal artınnan ğına tügel, atna-un kön diñgez buyında yatu öçen dä xalıq küp yöri. Änä Tatarstan prezidentı üze dä yıl da anda barıp yal itep qayta, qışın Şvetsariädä çañğı şuwıp, yazın Çexiäneñ Karlovy Vary-ında şifalı sular öçep qaytqannan soñ, sintäbr aylarında ul ğädättägeçä Antalya yanındağı Kämärgä kilep diñgez sularında qoyınıp kitä. "Min Tatarstan prezidentınnan qaysı yağım belän kim äle" dip bıyıl Törkiägä "Awlaq öy"neñ Tömändäge dustı Nail Alan da çığıp kitte, ämma ul yalın Kämärdä tügel, ä ikençe ber mäşhür şähärgä, Märmäristä yal itte. Berazdan sez anıñ "Awlaq öy" tıñlawçıları öçen genä cibärgän yulyazmasın işetersez, moñardan tış bez, Törkiädäge turizm häm anda Rusiädän kilep yal itüçelär turında törek başqalası Änkaradağı dustıbız Raynur Şakir belän dä söyläşep alırbız.

Törek köye

Şuşı törek köye sezne tieşle käyefkä borıp quyğandır, qäderle duslar. Märmäris barları häm diskolarında bıyıl ul iñ yaratıp tıñlanğannarnıñ berse ide. Törkiäneñ Ege diñgeze yarlarında yatqan şul şähärdän "Awlaq öy" dusları öçen maxsus Nail Alan xäbär itä.

Audio, Nail Alan

Bu Törkiäneñ Märmäris şähärennän Nail Alan ide. Qoyınası diñgezlär küp digännän, Märmäris Ege diñgeze yarlarında urnaşqan, ä menä küplärgä tanış Antalya Urta diñgezdä dip sanala. Ser tügel, näq menä Antalya soñğı yıllarda berençe çiratta Rusiädän kilep yal itüçelär belän tula. Gomümän, Törkiägä yalğa kemnär kilä soñ? Berençelekne qaysı illär tota? Şuşı sorawlar belän min, "Törkiä Awazı" radiosınıñ tatar tapşıruların äzerlägän Raynur Şakirğa möräcäğät ittem. Xäzer anı tıñlıyq.

Äñgämä, Raynur Şakir

Änkaradan Raynur Şakir söyläde "Awlaq öy" tıñlawçıları öçen. Çınnan da, ägär dä Törkiägä barıp çıqsağız, üzegezneñ tatar ikänegezne yäşerep yörmägez. Töreklär başta sezne qazaq yä üzbäk dip butasa da, irenmi genä añlatsağız häm äle ber-ike törek süze dä öyränep alsağız, alar küñelenä xuş kilersez. Läkin tatar bulu öçen genä ällä ni zur taşlamalarğa da ömetlänmägez, anda härkem aqça eşli, ä ul urıstan kiläme, tatardanmı, ällä britannanmı, barıber. Törkiä turındağı utırmanı berär matur törek cırı yabar inde, qäderle duslar. İdel-Uralda da tanış Tarkannıñ yaña ber cırı, "Dudu Dillerim". Utırmada qatnaşqan Nail Alan häm Raynur Şakirğa räxmätlär belän min inde bügengä mikrofonnan ayırılam, isän bulığız!

Cır, Tarkan
XS
SM
MD
LG