Accessibility links

Кайнар хәбәр

Miloşeviç östennän mäxkämä eşe yañartıldı


Öç atna cäyge tänäfestän soñ düşämbedä Hollandiäneñ Haaga şähärendä Yugoslaviäneñ elekke prezidentı Slobadan Miloşeviç östennän mäxkämä eşe yañartıldı. Küplär bu mäxkämäne ikençe dönya suğışınnan soñ ütkän Nüremberg protsesınnan birle iñ möxim mäxkämä dip sanıy. Bügenge utırış 1995-nçe yılda Srebrenica awılında meñlägän möselmannıñ wahşilärçä üterelüwen tikşerüdän başlandı.

Bu mäxkämäne küplär Nürembergtan soñ iñ möxim mäxkämä dip sanıy. Xärxäldä, Miloşeviç, suğış cinäyätläre öçen xalıqara mäxkämä aldına basqan berençe däwlät citäkçese buldı. Aña barlığı 60-tan artıq ğäyepläw belderelä. Şul isäptän 90-nçı yıllarda Serbiä, anarı Yugoslaviä prezidentı bulıp torğanda, Bosnia, Xorvatiä, Kosovoda genotsid ğämälläre qılğanı öçen. Mäxkämä inde ikençe yılına kerde. Soñğı waqıtta anıñ artıq ozaqqa suzıluwına şikäyätlär äytelä. Xalıqara Tribunalnıñ baş prokurorı Carla Del Ponte kiñäşçese Jean-Daniel Ruch, Azatlıqqa birgän äñgämäsendä, bu – bezneñ arqada tügel, dide:

Audio: "Döresen äytkändä, bez üzebez dä tizräk eş itergä telibez, di Rush, läkin Miloşeviçnıñ sälämätlege säbäple, berniçä utırış ütkärelmi qaldı."

Soñğı tänäfes tä, Miloşeviçnıñ sälämätlege arqasında yasaldı. Şuşı ayda 62 yäşen tutıraçaq Miloşeviç, yuğarı qan basımına zarlandı. Xäyer, prokurorlar, bu tänäfeslärgä qaramastan, eş yaxşı bara dip belderä. Jean-Daniel Ruch:

Audio: "Bez küp kenä şahitlärne tıñladıq, alar Miloşeviç, anda bulğan xällär turında citärlek mäglümät birde. Baş prokuror Carla Del Ponte fikerençä, mäxkämä xäzer tuqtatılğan oçraqta da, ğäyepläw belderü öçen dälillär inde citärlek."

Bügenge utırış yänä Srebrenica facigäsen tikşerüdän başlandı. 1995-tä Bosniäneñ bu awılında 7 meñ çaması möselman üterelgän ide. Şul üterülärdä qatnaşqan xorvat xärbie, Drajen Erdemoviç, bügenge utırışta şahädät birde. Bu cinäyäte öçen ul 5 yıl törmädä utırıp çıqqan, xäzer mäxkämädä şahit bularaq qatnaşa. Prokurorlar meñlägän möselmannıñ üterelüwe öçen Miloşeviç cawaplı dip sanıy. Miloşeviç üze, min ul çaqta Serbiä prezidentı idem, Bosniä eşlärenä tıqşınmadım, dip ğöyepläwlärne kire qağa. Şahitlär çığış yasap betergännän soñ, süz ğöyeplänüçe tarafqa bireläçäk. Miloşeviç mäxkämädä üzen-üze yaqlıy. Şuşı mäxkämä eşe tağın küpme däwam iter digän sorawğa Jean-Daniel Ruch bolay di:

Audio: "Saqlanuçı tarafqa üz dälillären kiterü öçen ber yıl çaması birelsä, dimäk, xökemne şul 2005-neñ başına kötergä kiräk."

Genotsid qıluda ğäyeple dip tabılğan oçraqta, Slobadan Miloşeviçqa ğömerlek törmä yanıy.

Ali Gilmi, Praga
XS
SM
MD
LG