Şunısı da qızıq, qinalğan jurnalist höcümnän soñ “02” telefonı aşa şaltıratqaç, militsiä kilep mäşäqätlänmägän, Matveevqa travmpunktqa barırğa kiñäş itkännär. Şuña kürä ul 8nçe sintäber könne tieşle käğäzlärne cıyıp şähär prokuraturasına möräcäğät itä. Näticädä qinalğan jurnalistnı häm anıñ ğäiläsen Äçke Äşlär İdaräsenä doprosqa çaqıralar, Matveevqa yasalğan höcüm buyınça tikşerü başlana. Ämma bu cinayät eşendä bik möhim dälil bulğan magnitofon yazması militsiä arxivlarında yuğala. Yazmada Matveevnıñ militsiä xezmätkärläre belän söyläşüe terkälgän bula.
Şulay itep, bu oçraqta ber genä tügel, ä berniçä cinayät buluı kürenä. Berençese - jurnalistqa höcüm yasaw, ikençese – höcümgä duçar bulğan, qatı qinalğan keşegä militsiä tarafınnan yärdäm kürsätelmäw häm öçençese – eçke eşlär idäräseneñ arxivları belän eşlägändä iğtibarsızlıq. Bu öç epizodnıñ ikesendä militsiä xezmätkärläreneñ qanunsız ğämälläre kürenä.Çärşämbe könnän başlap Sergey Matveevqa yärdäm itär öçen Älmätkä Qazan keşe xoquqların yaqlaw Üzägeneñ belgeçe Oleg Xabibraxmanov kilde. Xabibraxmanov Azatlıq Radiosınıñ xäbärçesenä äytkän süzlärençä, älegä Älmät militsiäse jurnalistqa höcüm eşen genä tikşerä, möhim audio kasseta yuğalğanğa sıltap, militsiä xezmätkärläreneñ xäräkätsezlege turında cinayät eşen quzğatırğa cıyınmıylar. Alay bulsa da keşe xoquqların yaqlaw üzägeneñ bu mäs’älägä qaraşı başqaça häm ul anı bolay ğına taşlamayaçaq, dip belderde Oleg äfände.
Keşe xoquqların saqlaw üzägen borçığan militsiä ğämälläreneñ tağın da ber misalı bar. Bıyılğı cäy konne Älmät şähäreneñ ikençe sanlı mäktäp uquçıların, 15 yäşlek Ayrat Safin, Timur Tuxbatullin häm Ayrat Fayzutdinovnı militsiä xezmätkärläre nigezsez uramda tuqtata häm qinap militsiä bülegenä alıp kitä. Anda käräzle telefonnı urlawda gäyepne üzlärenä aldırır öçen malaylarnı bernindi protokollar tözemiçä, rezina tayağı belän qinilar. Andıy ısulnı qullanıp ta bernindi näticägä ireşmägäç Göbäydullin familiäle militsiä xezmätkäre yäş yegetlärne beräm-beräm alıp kitep alarnıñ başların bädräf bülmäsendä unitazğa manıy. Bu da näticäsez bulıp çıqqaç qısqa waqıtta gäyepsez malaylarnı törle tän cäräxätläre belän irekkä cibärälär.Berniçä könnän alarnıñ äti-äniläre şähär prokuraturasına möräcäğät itkäç, prokurornıñ urınbasarı Badıykov militsiä ğämällärendä cinayät yuq dip, cinayät eşen quzğatudan baş tarta. Ul xätta bu qarar belän kileşmägän respublika prokuraturasınıñ da möräcäğäten kire qaqtı.
Xäzer bu ike eştä döreslekne tabır öçen Älmät militsiäse dä, Qazan keşe xoquqların yaqlaw Üzäge östämä dälillär ezli. Şulay itep, ber ük qanun bozılışlarnı däwläti orğannarı da, bäysez xoquq saqlaw oyışmaları da tikşergäç, döreslek tizräk açılırmı, bu turıda kiläçäktä xäbär itäçäkbezAzatlıq Radiosı öçen Qazannan İskändär Nurmi.