15-16nçı sintäberdä Ufa şähärendä Rossiä Federatsiäse mäğärif citäkçeläreneñ utırışı buldı. Bu çara turında “Azatlıq”radiosı häm başqa mäğlümat çaraları xäbär itkän ide inde. Anda Rusiä Federatsiäse mäğärif ministrı Vladimir Filippov qatnaşırğa tieş ide. Älege çara Başqortstan Prezidentı saylaw kampaniäse qızıp barğan waqıtta ütüe cämäğätçelekneñ iğtibarın arttırdı. Çınlap ta bu kiñäşmä niçek ütte ikän digän soraw belän ,bez, äle genä Ufadan Qazanğa qaytqan Tatarstan respublikası mäğärif ministrı Faris Xarisovqa möräcäğät ittek. Ul menä närsälär söyläde:
“Bu utırışta berniçä mäs'älä qaraldı: profil'le uquğa küçü, däwlät attestatsiäse slujbasın tözü, uqıtuçılarnıñ belemen kütärü, östämä belem birü häm başqa mäs'älälär. Kiñäşmäne alıp bardı Rusiä mäğärif ministrınıñ berençe urınbasarı Viktor Bolotov. Berençe süz belän kiñäşmäne açıp cibärde Başqortstan Prezidentı MortazaRäximov”dide ul.
Başqortstanda tatar cämäğätçelege tatar telen uqıtu mäs’äläse turında bik borçıla. Çönki törle oyışmalar törle mäğlümat birä. Başqortstan Tatarlar Syezdı räise Eduard Xämitov äytüençä, Başqortstannıñ 1200 mäktäbendä tatar tele uqıtıla. Ä ictimaği oyışmalar citäkçeläre äytüençä barlığı 450 mäktäptä genä .Gimnaziälär sanı barlığı 70 bulsa- şularnıñ 43- başqortça,ä 2sе –tatarça. Şul säbäple bez Faris Xarisovqa tağın ber soraw birdek. Başqortstandağı tatar mäktäplären kerep qaradığızmı digän sorawğa, ul bolay dip cawap birde.“Başqortstan respublikası mäğärif ministrlığı urınbasarı, milli mäs'älälär bülek başlığı belän prinsipial' söyläşü buldı dip belderde. İke respublikanıñ däresleklär avtorları Ufada oçraşıp bezneñ yaqtan nindi täqdimnär bulsa, alar şularnı qabul itärgä äzer digän fikerdä qaldım”
İke respublika avtorları tatar tele däreslekläre çığaruda bergä eşli alırlarmı , Başqortstandağı tatar mäktäplären däresleklär belän tä'min itü cayğa salınırmı? Xäzergä bu sorawlar açıq qala.Qazannan Azatlıq radiosı öçen Mälikä Basıyr.
