Xäzer respublikada sport yaratuçılarnıñ iğtibar üzägendä ike töp tema – futbol häm xokkey yarışları. Soñğı aralarda turnir tablitsasında öçençe, xätta ikençe urınnarda barğan Rubin futbol komandası aldınğılar saflarınnan küçä başladı. Soñğı uyınnı öyendä, Qazanda uynawğa da qaramastan, Rubin Sankt-Peterburgnıñ Zenit komandasına ottırdı. Şulay itep, Rusiäneñ futbol çempionatınıñ soñğı uyınnarı aldınnan Rubin xäzer 4 urında ğına bara. Ä menä xokkey söyüçelärneñ barısı da äle alda. Çönki xokkey buyınça yarışlar äle başlanıp qına kitte. Şuña da qaramastan, respublikanıñ ike komandası – Aq Bars häm Nefteximik inde ciñülärgä ireşä başladı. Sişämbe könne bu ike komanda üzläreneñ bozlarında Mäskäwneñ Dinamo häm Magnitogorskinıñ Metallurg komandaların ciñde. Yıraq Krit utrawında alardan Tatarstan şaxmatçıları da qalışmıy. Qazannıñ Lad’ya-Qazan-1000 isemle komandasında, inde xäbär itkänebezçä, tanılğan şaxmatçı Garri Kasparov ta uynıy. Älege komanda Yevropa klublarınıñ Kubogı uyınnarında inde öçençe ciñüenä ireşte. Şulay itep, alar xäzer berençe urında baralar. Bu yarışta xatın-qızlar arasında da köräş bik köçle bara. Xäyer, respublikanıñ Alisä Ğällämova citäkçelegendäge xatın-qızlar komandası sınatmıy. Alar da Kubok uyınnarında berençe urınnarda baralar.
Gölnaz İlgizär
