Uzğan yal könnärendä Rusiä awıl xezmätkärläre bäyräm itte. Awıl keşeläreneñ hönäre bäyrämen Mäskäwdä dä ütkärdelär. Bäyräm çaralarında respublikanıñ premyer-ministrı urınbasarı, awıl xucalığı ministrı Marat Äxmätov citäkçelegendäge Tatarstan törkeme dä qatnaştı. Tatarstan bıyıl uñış cıyuda iñ aldınğılardan buldı. Respublika igençeläre xätta Rusiäneñ yıl sayın iñ mul uñış ala torğan Krasnodar, Sarıtaw ölkälären dä uzıp kitep, börteklelärne gektardan 34 sentner cıyıp alğannar.
Läkin şuña da qaramastan, qayber aqıllı başlar çäbäkäy itep, şatlanıp sikergälise urınğa şundıyraq kramol'nıy soraw quyalar – ikmäk üste, ä qayçan bayırbız soñ? Uzğan yıllarda Rusiädäge yuğarı uñışnı tabiğät afäte itep qabul ittelär. İkmäk üsüen üsä, ämma anı eşkärter, saqlar öçen cihazlar häm kelätlär citmi. Qaytarıp salğan uñışnıñ eçerep, yuqqa çığuı – üze ber faciğä. Şulay da bıyıl üskän ikmäkne satıp, burıçlarnı tülärgä ömet yuq tügel. Döres, näq şuşı könnärdä ikmäk bäyäseneñ beraz ğına artuı käyefne qıra.
Şuña da qaramastan, Mintimer Şäymiev yaldan qaytuğa Tatarstanda küñelle eşlär kötelä. Arış-boday üsterü buyınça Tatarstan – Rusiä çempionı. Xäyer, yaña 2004nçe yılğa byudjet tözegändä itäk-ciñnärne qısqartırğa turı kilä. Däwlät Sovetınıñ sessiäsendä qaralaçaq byudjetta küp kenä çığımnar bermä-ber kimetelä.
