Accessibility links

Кайнар хәбәр

Azärbaycan oppozitsiäse prezident saylawlarınıñ räsmi näticälären tanudan baş tarta


Atnakiç qanlı bäreleşlär kiçergän Baku uramnarı comğa könne, kiyerenkelek artır dip kötelsä dä, çağıştırmaça tınıç ide. Läkin politsiä köçläre anda haman da xäwef xälendä qala birä. Mäğlüm ki, Azärbaycandağı çualışlar, anda çärşämbedä uzğan prezident saylawlarınıñ berençel näticälären iğlan itü belän başlandı.

Atnakiç bulğan cualışlarnıñ yänä qabatlanuwına yul quymas öçen Azärbaycan xakimiate başqalağa ilneñ başqa töbäklärennän östämä politsiä köçlären kitertte. Şähärdä ğomumän qırıs iminlek çaraları kertelde, üzäkneñ xalıq cıyıla alırlıq urınnarında tärtip saqlaw köçläre utırğan avtobuslar tora ide, uramnarda BTR-lar kürende. Atnakiç Baku uramnarına cäyelgän bäreleşlär, üzäk saylaw komissiäseneñ çärşämbe uzğan prezident saylawlarınıñ berençel näticälären iğlan itüwe, anda tawışlarnıñ küpçelegen xäzerge prezident Xäydär Alievneñ ulı İlham aluwı belderelgännän soñ başlanıp kitte. Älegä bäyän itelgän mäğlümatqa qarağanda, keçe Aliev sanalğan tawışlarnıñ yaqınça 80-läp protsentın qazanğan, ä oppozitsiäneñ töp wäkile, "Musavat" partiäse citäkçese İsa Ğämbär añardan şaqtıy qalışa, anı yaqlaw barı tik 12 protsent tiräsendä genä dip xäbär itelä. Bu räsmi sannar, läkin Azärbaycandağı oppozitsiä moña ışanmıy, xakimiatne, tawış birü näticälären üzenä niçek kiräk şulay üzgärtüdä ğäyepli. Ğämbär ğomumän saylawlarda üzeneñ ciñep çığuwın belderä häm monı raslaw öçen bar xoquqi çaralarnı da qullanaçağın äytä. Radiobıznıñ azärbaycan redaksiäsenä ul şulay dip belderde.

Audio, İsa Ğämbär

"Bez xalıqnıñ telägen häm tawışın saqlarğa wä yaqlarğa telibez häm bu eşebezne däwam itäçäkbez" di azärbaycan oppozitsiäse citäkçese İsa Ğämbär. Xäzerge xakimiatkä qarşı çıqqan başqa säyäsi oyışmalar da çärşämbe saylawlarınıñ räsmi näticäsen tanudan baş tarta. Azärbaycannıñ Milli bäysezlek partiäse citäkçese Etibar Mamedov, misal öçen, "tawış birü tulısınça xärämläşülär belän uzdı" dip belderde. Atnakiç bäyän itelgän urtaq belderüdä "Musavat", Milli bäysezlek partiäse, Azärbaycannıñ Demokratik partiäse häm Xalıq frontınıñ reformaçıl qanatı Alievlär ğailäsen ildäge xakimiatne üz qulına aluda ğäyepli. Şunda uq oppozitsiä Amerika Quşma Ştatların häm Yevropa Berlegen Azärbaycandağı säyäsi wäzğiatne döres itep, riasız bäyäläwgä öndi. Ämma qayber illärneñ citäkçeläre, ayırım alğanda Baku öçen möhim sanalğan Rusiä, Törkiä, Qazağstan häm Gruziä citäkçeläre İlham Alievne inde xälitkeç ciñü belän täbrikläp tä çıqtı. Yevropa Berlege älegä üz mönäsäbäten beldermäde. Quşma Ştatlardan isä azärbaycan saylawları uñayınnan qarşılıqlı xäbärlär kilä. Däwlät departamentınıñ matbuğat wäkile urınbasarı Adam Ereli fikerençä, tawış birü bar xalıqara taläplärne qänäğätländermäsä dä nigezdä tärtiptä uzğan.

Audio, Adam Ereli

"Quşma Ştatlarnıñ küzätüçeläre saylawçılar isemlege belän bulğan, basım yasaw, başqa şundıy citeşsezleklär kebek problemalarğa yulıqqan. Bez şulay uq tawış birüdän soñ başlanğan köç qullanularğa da borcılu belderäbez häm oppozitsiädäge partiälärne tınıç häm qanuni qısalarda eş itärgä çaqırabız" di amerikan däwlät departamentı wäkile. Azärbaycan xakimiate atnakiç Bakuda bulğan cualışlar öçen cawaplılıqnı tulısınça oppozitsiägä, xätta şäxsän İsa Ğämbärgä yökli. Başta bäreleşlär 2 keşeneñ, şul isäptän ber balanıñ ülüwenä kiterde dip xäbär itelsä dä, politsiä soñraq 1 hälak buluçı xaqında ğına belderde. Keşe xoquqların saqlawçı törkemnär isä, Bakudağı cualışlar öçen xakimiat üze ğäyeple, çönki ul ildä oppozitsiä öçen urın qaldırmadı dip isäpli.

Kärim Kamal, Praga
XS
SM
MD
LG