İjaw şähäreneñ tatar törkeme bulğan ber baqçasında şiğriät bäyräme bulıp ütte

İjaw şähäreneñ 215nçe balalar baqçasında tatar balaların ber törkemgä cıyıp milli tärbiä birü yunäleşendä eşli başladılar. Bu balalarnıñ kübese baqçadan mäktäplärneñ tatar sıynıflarına, tatar gimnaziäsendä tuğan teldä belem aluın däwam itä. Bu atnada älege balalar baqçasında şiğriät bäyräme bik qızıqlı bulıp ütte. Baqça xezmätkärläre üzläreneñ qısalarında ğına çiklänep qalmağan, bäyrämgä tirä—yun'däge baqçalardan da tatar, udmurt telen öyränüçe balalarnı çaqırğannar. Tärbiäçelär qısqa ğına ämmä bik eçtälekle itep Udmurtiä respublikası turında, anda yäşäwçe millätlär xaqında añlayışlı itep mäğlumat birde, cömhüriätneñ ataqlı keşeläre belän tanıştırdı. Annan soñ bäyrämneñ xucaları — balalar buldı. Udmurt, rus tatar şağirläre äsärläre tuğan tellärendä häm tärcemä itelep tä yañğıradı.

Audıo

Cırlarnı da küp itep öyrängän balalar.

Baqçanıñ muzıka xezmätkäre Tat'yana Barinova şuşındıy bäyrämnärne äzerlägändä küp qıyınlıqlar ütärgä turı kilä, bigräk tä tatar telendä balalar öçen muzıykal' äsärlärne tabuı qıyın, dip zarlandı belgeç. Ul alarnı tanışlarınnan, balalar aşa ata—analardan ezli, üzem dä yazıştıram dip quydı.

Audio

Şuña da karamastan şiğriät bäyräme bik küñelle ütte. Balalar öç — tatar, rus, udmurt milläte avtorları belän tanıştı, äkiät geroyları belän bergä törle uyınnarda qatnaştı. Bu baqçağa balaların yörtüçe ata—analar qänäğät. Alarnıñ berse— Rezeda Ğäynullina belän aralaşıp ta ölgerdem

Audio

Baqça mödireneñ yärdämçese Älfirä Räis qızı Xamidullina milli tärbiä eşenä tuqtalıp, bolay dide.

Audio

Şulay itep, balalar keçkenäden üz tiräsendä yäşäwçe millätlär belän tanışa, alarnıñ mädäniäten, ädäbiäten üzläşterä, bu, üz çiratında, millätara duslıqnı nığıtılu da etärgeç bulıp tora.

Xämidä Ğayfullina, Udmurtiä.