Accessibility links

Кайнар хәбәр

Tatarstanda yäşäwçe möselmannar Ğäydel-Fitr bäyräm itä


25nçe noyäber Ramazan ğäyete uñayınnan Tatarstan prezidentı Mintimer Şäymiev “Единая Россия” firqäse citäkçeläreneñ berse bularaq möfti Ğosman İsxaqiğa qotlaw telegramması cibärde. Tatarstan Diniä näzaräte räise möfti Ğosman İsxaqi qotlawında “uzıp baruçı 2003nçe yıl Rusiä möselmannarına mönäsäbätneñ yaxşıruın kürsätte” dielä. Moña dälil itep möselman xatın-qızlarğa pasportqa surätkä töşkändä ayulıq bäyläp töşärgä röxsät itelüe häm Rusiä prezidentı Vladimir Putinnıñ İslam konferensiäse oyışmasına kerü başlanğıçı kiterelä. Äye, Rusiädä islam belän yaxşı uq isäpläşergä mäcbürlär. Bıyılğı Uraza bäyrämendä dä bu yaxşı uq sizelä. Rusiä prezidentı möselmannarnı, elekke sovet zamanı stilençä, bäyräm belän qaynar qotladı disäñ dä bula. Rusiä televidenieseneñ yañalıqlar çığarılışınıñ här bersendä Ramazan ğäyete teması bar. Xäbärlärdä Rusiädä 20 million möselman yäşi, 7 meñ mäçet bar dielä. Tatarstanda äle bezdä fälän million möselman yäşi dip qıçqırıp äytelmi. Mäçetlär sanı çama belän 1 meñnän artıq dip äytelä. Çönki här ay sayın mäğlümat çaralarında fälän awılda mäçet açıla yaqtaşlarnı çaqırabız digän iğlannarnı istä qaldırıp beterep tä bulmıy. 90nçı yıllar başında Qazannıñ Tawlar bistäse möselmannarınıñ xıyallarında ğına bulğan Xuzäyfä mäçete dä şöker inde menä 5-6 yıl möselman bäyrämnärendä xalıq belän tulıp görläp tora. Bügenge bäyrämdä dä şulay buldı. Cıyılğan xalıq arasında yäşe-qartı barısı da bar. Mäçet qarşısındağı tartmağa fitır sädaqası salıp tıynaq qına bäyräm wäğäzen tıñlap toruçılar arasında televizor ekrannarı aşa yaxşı tanış eşmäkärne dä, tanılğan jurnalistnı da, xätta ber ministrnı da kürergä bula ide. Ä mäçet eçenä kerep, namazğa basuçılar arasında üzbäklär, äzerbäycannar küp. Qaysısın Tatarstanda yäşäwçe möselmannar sanına kertergä, qaysısın kertmäskä ber Alla ğına belä. Bıyıl mäçetlärdä säyäsätçelärne dä kürergä bula ide. Yılı şundıy - alda saylawlar. Bötentatar ictimaği üzäge räise Räşit Yağfärov eşkä çumıp utıra ide. “Azatlıq” radiosı xäbär itüençä ul äle genä Başqortstannan qayttı.

Audio

Böten tatar ictimaği üzäge fikerençä Başqortstanda saylaw aldı wäzğiäte Başqortstandağı tatar yazmışı öçen xälitkeç stadiäsenä kergän. Tatar milli xäräkäte monı bitaraf küzätep tora almıy.

Yunıs Ätnäle

XS
SM
MD
LG