Accessibility links

Sember ölkäsendä saylawlar uzsa da, bu çaranıñ näticäläre iğtibar üzägendä qala birä


Ölkä başlığı Vladimir Şamanov fikerençä, “iñ möhime – xalıq “Berdäm Räsäy” firqäsenä ışanıç belderde”. Läkin ul bötenläy qänäğät tügel. Öç rayonda partiä üzeneñ buldıqsızlığın kürsätkän, ölkä üzägendä “barısına qarşılar” “firqäseneñ” ciñep çığuı arqasında “Berdäm Räsäy”neñ töbäk buyınça citäkçese Aleksandr Frolov Däwlät Dumasına uza almağan. Monda tabibä Ğalina Fedorovanıñ da ğäyebe bar ikän: ul, şul uq firqä äğzası buluğa qaramastan, kiñäşläşmiçä, kandidat bulıp terkälgän. Şamanov xätta anı partiädän çığaru kiräklegen dä äytte. Läkin Fedorova üzen ğäyeple dip sanamıy: “Miña berkem dä kire adım yasarğa täqdim itmäde, min partiädä qalam”,- dide. “Partiä” süzen şundıy qullanu KPSS zamannarın iskä töşerä, läkin xalıq ikençeräk ikän inde – ölkä üzägendä 6 okrug buyınça “barısına da qarşılar” ciñep çıqqan.

Ölkä buyınça Baş Federal' inspektor Aleksandr İvanov isä mondıy näticägä borçıluın belderde, “protestlı tawış birü uylanıp qararğa säbäp bulıp tora”, dide. Yuğisä, ällä ni tirän uylanular kiräkmi dä. Awıl cirendä saylaw näticäläre öçen anıq cawaplılar bar – awıl häm rayon başlıqları. Alar kiräk näticä tä'min itärgä tieş. Ä şähärdä eş qatlawlıraq – turıdan-turı cawaplı vertikal' yuq.

Moña qädär Ölkä qanunnar çığaru cıyılışında da, Şähär Dumasında da ber genä tatar keşese dä bulmadı. Ber mandatlı okruglar buyınça bu yulı da millättäşlärebez saylana almadı. Şul isäptän, ölkä üzägendä Cirle parlament deputatı bulır öçen köräşkän Alsu Balaqişieva da. Xäyer, bu xanım “Berdäm Räsäy” firqäse isemlege buyınça 6 deputatnıñ berse bulıp terkälgän. Partiälär isemlekläre buyınça, “Berdäm Räsäy”dän tış, jirinovçılar, kommunistlar häm “Xalıq Frolıç yaqlı” digän berläşmä öçär deputat uzdıra aldılar.

Saylawlardan qala, citäkçelekneñ töp qayğırtuı – patriotik tärbiä. Ere şirqätlär, xärbi zavodlar, xärbi çast'lär, uqu yortları, muzeylar citäkçeläre, firqälär häm ictimaği oyışmalar wäkilläre qatnaşlığında ölkä kiñäşmäse uzdı. İseme bolay: “Watanpärwärlıq – däwlät iminlegeneñ ruxi nigeze”. Qabul itelgän rezolyutsiäneñ töp mäğnäse dä şul uq yünäleştä: “Räsäy härwaqıt köçle, berdäm, çäçäk atuçı il bulsın öçen, töp burıç – patriotik tärbiäne kiñäytü”. Tik menä “patriotizm” töşençäseneñ eçtälege doşmannar ezläwgä, alarnı faş itü häm, alarğa qarşı toru öçen, köçle bulu kiräklegenä qaytıp qala. Patriotlıqnıñ iñ başta tuğan cireñne, tuğan awılıñnı yaratu, dimäk yäşägän cireñne paq totu, häm eşläp aşarğa öyränü ikänlege ällä ni iğtibar laq tügel. Patriotnıñ şulay uq qanunnarnı tögäl ütärgä tieşlege dä.

Tanılğan patriot, yäş qız El'za Kungayevanı ütergäne öçen 10 yılğa xökem itelgän polkovnik Budanov tieşle cäzasın alırğa Sember ölkäse Mäläkäs (Dimitrovgrad) şähärendä urnaşqan YUİ-78/3 digän törmägä kiterelde. Üzeneñ can dustı Vladimir Şamanov qaramağına, gä dä buladır. Bu turıdağı xäbärendä räsmi basma “Narodnaya gazeta” atna-un kön elek menä ni digän ide: “Budanov ğomum şartlarda totılaçaq, üzsenderü yäki taşlamalar bulmayaçaq”.

Küp tä ütmäde, Budanovnı törmädäge sportkompleks mödire itep quyğannar. Wazifası – zona eçendä basketbol, voleybol, östäl tennisı uyınnarı buyınça törmä çempionatları oyıştıru, kompleksnı tärtiptä totu. Häm, älbättä inde, ristannarnı patriotik ruxta tärbiäläw. Sportkompleksnıñ iseme dä moña turı kilä: “Rus'” dip atala ul.

Ayrat İbrahim, Sember.
XS
SM
MD
LG