Düşämbe könne Tatarstannıñ Ministrlar Kabinetı 2003 yıldağı iñ soñğı utırışında iqtisat, xucalıq häm sotsial' mä’sälälärneñ xäl itelüen tikşerde. Şimbä könne Qazan Kremlendä törle däräcädäge ğalimnär, mädäniät, sänğät xezmätkärläre cıyılğan ide. Mintimer Şäymiev alarğa respublikanıñ däwlät büläklären, maqtawlı isemnär, Rusiä däräcäsendäge büläklärne tapşırdı. Aldan äytkänebezçä, Tatarstannıñ bıyılğı däwlät bülägen aluçılar arasında “Tatarlar” dip atalğan akademik basmanıñ avtorları da bar. Ayırım alğanda, Räwfä Urazmanova, Damir İsxakov, Rozalina Musina, Svetlana Suslova, Nail Xalikov, Rämziä Möxämmädova häm “Tatarstan: tel simmetriäse häm assimetriäse” kitabı avtorı Luiza Bäyrämova da bar.
