İrannıñ qadimçe Saqçılar Şurası kiläse ayda ütäse saylawlardan çitlätelgän 3 meñnän artıq namzätneñ 550-senä saylawda qatnaşırğa röxsäten birgän. İrannıñ däwlät televideniese İnternet säxifäsendä, Şuranıñ matbuğat wäkile Möxämmät Caruminıñ "ay axırında tağı da kübräk namzätkä röxsät bireläçäk" digän süzläre kiterelgän. Bügen ilneñ prezidentı Möxämmät Xattami, ildäge säyäsi cancalğa qaramastan, saylawlar, aldan bilgelängänçä, 20 Fivraldä üter digän ışanıç belderde. İnde xäbär itkänebezçä, bu cancal, Saqçılar Şurası 8 meñnän artıq namzätneñ yartısın saylaw isemlegennän sızıp taşlağaç başlanıp kitkän ide. Sızıp taşlanğannarnıñ kübese reforma taraflı namzätlär.
