Bügen Leningrad şähäreneñ qamalıştan azat itelgän köne. Xäzerge Piterbur, ä ul waqıttağı Leningrad Qazandağı qayber keşelär öçen dä tuıp üskän, yaqın cir. Şähär qamalıştan çıqqannan soñ, yäğni 1944nçe yılda, Qazanğa eşelon-eşelon Leningrad xalqı kilgän bulğan. Qaysıberläre, suğıştan soñ, kire qaytıp kitkän, ä qaysıberläre - Tatarstanda yäşäp qalğan, monda alarnıñ balaları, onıqları tuğan. Läkin Leningrad turında xatirälär här waqıt küñellärdä yäşi ikän.
Xäzerge waqıtta, Leningradtan küçep kilgännärneñ bik azı ğına isän. Açlıq häm suğış sälämätlekne qaqşatqan, 60 yıllıq ğömer dä uzğan inde. Räsmi oyışmalarnıñ mäğlümatlarına qarağanda Tatarstanda xäzer 545 Leningrad keşese häm anı blokada waqıtında saqlağan 620 veteran yäşi. Tağın «Leningradnı saqlağan öçen» digän medal’ belän büläklängän suğışçılarnıñ 390 tol xatını bar.
Qazanda «qamalışta yäşäwçe»lärneñ cämğiäte eşläp kilä. Şuşı ictimaği oyışmada Leningrad häm suğış turında istäleklärne saqlawçı fidaqär keşelär eşli. 27nçe ğinwar könne Qazannıñ barlıq rayonnarında diärlek blokada betüneñ 60 yıllığına bağışlanğan çaralar ütte. Mäsälän, şähärneñ sotsial xezmät kürsätü üzägendä Leningradta qamalışta bulğan veterannar oçraştı, suğış yıllarındağı cırlarnı cırladı, ul dähşätle zamannarnı iskä töşerde. Mäktäplärdä, uquçı balalar belän oçraşular buldı, rayon başlıqları veterannar belän küreşte, qamaw betüneñ 60 yıllığına bağışlanğan bäyräm konsertları ütte.
Tarix belän qızıqsınuçılar öçen suğış waqıtında yazılğan xatlar belän tanışu mömkinlege açıldı. Üzäk arxivta şuşı köngä bağışlanğan kürgäzmä eşli başladı. Anda mäsälän, Leningrad kompozitorı Yudinnıñ Tatarstannıñ ölkä komitetına yullağan xatı, balalar yazuçısı Vereyskayanıñ tatar yazuçısı Äxmät İsxaqiğa xatı da urın alğan. Kürgäzmädä şulay uq, Leningrad sızığı suğışçıları häm Tatarstanğa evakuatsia waqıtında küçerelgän balalarnıñ fotosurätläre belän dä tanışırğa mömkin.
Tatarstandağı 6 veterannıñ Piterburdağı bäyräm çaralarında qatnaşu mömkinlege tudı. Sotsial tä`eminät ministrlığı mäğlümatlarına qarağanda, alar bügen Qazannan Piterburğa kitep bardı.
Böten suğış veterannarı kebek uq, Leningrad blokadasında bulğannar da, bik ez pensiägä ğömer kiçerä. Bäyräm çaraları uñayınnan, alarnıñ xäle ez genä yaxşırırğa mömkin. “Tatar-inform” agentlığı xäbär itkänçä, Leningrad blokadasında bulğannarğa 900 sum , ä tol xatınnarına 450 sumlıq sotsial yärdäm bireläçäk.
Bikä Timerova.
