Zur konsertlar, kiçälär uzdırıla torğan Piramida tamaşalar üzägendä 31nçe ğinwarda bik üzençälekle çara bulıp ütte. Anda tumıştan yöräk awırulı balalarğa yärdäm itü buyınça “Bala yörägenä qağıl” dip atalğan xäyriä aksiäse ütte. Zalda balalar, ata-analar, tabiplar buldı, ä säxnädän meditsina xezmätkärläre, şähär, respublika citäkçeläre, artistlar çığış yasadı.
Süz menä närsä turında bara. Ni qızğanıç, yış qına balalar awıru tua. Läkin alar äti-äniläre öçen ğäziz häm cämğiät öçen dä bik kiräk. Küz aldında xalıq kimep barğanda, dönyağa kilgän keçkenä keşene awıru quyınında qaldıru üze ber faciğa. Ä bit tumıştan uq yöräk awırulı balalarnı tereltergä mömkin. Yış qına waqıtında yärdäm alğan balalar xätta intellektual' yaqtan üz yäştäşlären uzıp ta kitä.
Älege waqıtta Qazanda 219 meñ bala kardiolog, kardioxirurg yärdämenä moxtac. Sabıynıñ yörägen ana qarınında yatqanda uq maxsus fonendoskop yärdämendä tikşerep toralar.Tuğaç ta alarğa elektorkardiogramma töşerelä. Yöräk tibüendä tabılğan çit tawış awıruınıñ berençe bilgese. Darular yäki operatsiä yärdämendä şuşı balalar sälämät häm ozın ğömerle bulu bäxetenä ireşälär. Läkin matdi çığımnar bik zur, ber operatsiä xaqı 60-120 meñgä yaqın. Bala yörägenä qağıl aksiäse yöräk awırulı keçkenä balalar yazmışına cämäğätçelek iğtibarın yünältä, däwalaw öçen matdi yärdäm tuplarğa yärdäm itä.
Yış qına keşe balalardağı yöräk çireneñ awırlığın añlap citmi. Mäglümat çaraları, jurnalistlar yöräk awırulı balalarnı tabu häm belgeçlärgä konsul'tatsiägä cibärergä yärdäme itä ala. Piramidada ütkän aksiä waqıtında tabiblar jurnalistlarğa şul turıda söyläde. Şähärneñ sälämätlek saqlaw idäräse citäkçese Wasil Ziätdinovnıñ jurnalistlar öçen yasalğan konferensiädä yöräk awıruli balalarnı tabip, waqıtında däwalaw yortına cibärügä öndi.
Uzğan yılnıñ 13nçe avgustında ütkän şundıy uq aksiädän soñ cıyılğan 1 million sum artıq aqçağa 17 meñgä yaqın balalarnıñ yöräklärenä operatsiä yasalğan. Bu yärdäm bik kiräk. Kiçädä tabiblar belän bergä avgust ayında däwalanğan balalarnıñ äti-äniläre üz bäxetläre - balalarınıñ saw-salämät buluları turında söylädelär.
Uzğan şimbädä Piramidağa kilgän eşquarlar izge eşkä zur ğına summalar kertte, 100 sumğa bilet alıp kergän xalıqnıñ öleşe - barısı da balalardağı yöräk awıruların däwalawğa cibärelä. Respublika citäkçelege häm “Berdäm Rossiä” partiäseneñ respublika bülege isemennän Färit Muxametşin çığış yasadı. Şähär başlığı Kamil İsxakovnıñ möräcäğäte yazdırılğan videotasma kürsätelde.
Kiçäneñ yomğaqlaw öleşendä «Nejnıy yad» - “Nazlı ağu” törkeme çığış yasadı. Yäşlär öçen bu populyar törkem belän oçraşu çın bäyräm buldı. Alar törkem belän bergä biedelär, cırladılar. Ä säxnä pärdäsendä yaltırağan kömeşsıman yoldızlar miña çirle balalarnıñ küzläre kebek bulıp kürende. «Bezneñ dä yäşise kilä”dip endäşä sıman alar. Bu yulı alarnı işetkännär - dip yuanası ğına qala.
Al'bina Zaynulla, Qazan
