Accessibility links

Кайнар хәбәр

Yäşlär häm sport eşläre ministrlığına millilek kiräkme?


Yäşlär häm sport eşläre ministrlığınıñ eşçänlege - kiñ qırlı. Bu oyışma qaramağında mädäniät, yäşlär, sälämätländerü, icat üzäkläre, sport mäktäpläre, yäşlärneñ eş birjası, tellär öyränü mäktäpläre, mäğlümat üzäkläre dä tora. Şuña östäp ministrlıq respublikada yäşlär säyäsäten ütkärä, kübesençä xakimiät firqäseneñ eşendä qatnaşqan häm turizmnı üsterü belän şöğellänä.

«Aq Bars» üzägendä oyıştıralğan kürgäzmädä, ministrlıqnıñ här bülege üzen kürsätte. Küp sanlı räsem, kitaplar, bilgelär arasında, milli kiemnäre, çigüle äyberläre belän Çallı delegatsiäseñ kürgäzmäse ayırılıp tordı. Bu «Şatlıq» yäşlär üzägeneñ äyberläre bulıp çıqtı. Anıñ citäkçese Yeremina Änüzä Ğindulla qızınıñ äytüenä qarağanda, üzäk milli moda,

tegü, biü, cır kollektivların üz eçenä ala. Üzäk kübesençä üze eşläp tapqan aqçağa kön kürä.



«Aq Bars» üzägendä bulğan yıllıq utırışta berençe itep, ministr Marat Bariev çığış yasadı. Ütkän yılda ministrlıq yäşlär säyäsäten 9 törle yünäleştä alıp barğan ikän. Mäsälän yäş ğäilälärgä fatirlar tözep birgän, narkomaniä häm SPİDqa qarşı köräş alıp barğan, qanun bozularğa qarata kisätü çaraların kürgän, awıl häm şähär yäşlären cälep itep törle festival’lär uzdırğan.



«Berdäm Rusiä» firqäseneñ yäşlär qanatın oyıştıruğa da, yegetlärne-qızlarnı saylawlarğa barırğa häm döres itep tawış birdertügä dä ministrlıq küp köç salğan.



Rayon, şähärlärdä sport üseşe öçen dä ministrlıq cawaplı. Bu yünäleştäge uñışlarnı sanağanda, cıyılışta bulğan xökümät räise Röstäm Miñnexanov, ministrnıñ süzen bülderep, Marat Bariev citäklägän oyışmanı, rayon başlıqların tänqitläp aldı. Ul yäşlär eşläre häm sport üseşe öçen byudjet birgän aqçalarnı tieşle maqsatta sarıf itärgä kiñäş itte.



Ministrlıqnıñ eşçänlege kiñ qırlı bulsa da, barıber, milli yäşlär öçen ütkärelä torğan çaralarğa urın az qala. 2004nçe yılda xäl üzgärerme, yuqmı älegä äytüe awır. Aldağı planğa kertelgän milli çaralar sanı – ütkän yıldağıdan kübräk tügel.

Bikä Timerova.

XS
SM
MD
LG