Rusiä Üzäk saylaw komissiäse räise Aleksandr Veşnyakovnıñ Tatarstanğa räsmi säfäre comğa könne däwam itte. 13nçe fevral’ könne ul respublikanıñ Üzäk saylaw komissiäse wäkilläre belän oçraştı. Anatoliy Fomin Mäskäw qunağın dekaber’dä ütkän saylawlarnıñ barışı, alarnıñ näticäläre belän tanıştırdı. Bu saylawlardan soñ Tatarstanda mäxkämälärgä möräcäğät itülär bulmawnı, Aleksandr Veşnyakov ayıruça zur uñış dip bilgeläp ütte. Ğomumän, ul respublikada saylawlar bik oyışqan räweştä, tınıç ütä, saylaw qanunnarın bozu oçraqları yuq diärlek, dip bilgeläde. Şul uq comğa könne Rusiä Üzäk saylaw komissiäse citäkçese Tatarstan prezidentı Mintimer Şäymiev häm törle säyäsi firqälär wäkilläre belän oçraştı. Şuşı oçraşu, söyläşülärdän soñ, Aleksandr Veşnyakov jurnalistlarnı cıyıp, alarğa üzeneñ Tatarstanğa vizitı turında söyläde. Şunda uq ul saylawlarnıñ tiskäre ürnäge itep Başqortstan respublikasında 7nçe dekaberdä uzğan saylawlarnı kiterde. Comğa kiçen, Qazanda bar planlaştırılğan eşlären tämamlap Aleksandr Veşnyakov kire Mäskäwgä qaytıp kitte.
Tatarstanda bu könnärdä İdel buyı häm Ural xärbi okrugınıñ iñ zur häm külämle töbäkara xärbi künegüläre ütä. Anda xärbilärdän tış, respublikanıñ barlıq diärlek ministrlıqları, şähär häm rayon xakimiätläre wäkilläre, şulay uq respublikadağı zapastağı ofitser häm soldatlar da qatnaşa. Älege künegülärneñ citäkçese general-leytenant Aleksandr Stolyarov süzlärenä qarağanda, alarnıñ maqsatı – xärbi häm xakimiät oyışmalarınıñ suğışqa äzerlegen tikşerü. Tatarstan yağınnan bu künegülärne armiädä bulmağan xärbi – premyer-ministr urınbasarı Zilä Wälieva oyıştırdı. Respublika cirendä ütkän künegülärdä qatnaşqan başqa generallar belän bergä Zilä Wälieva uzğan yılnıñ noyäber ayında Xantı-Mansi okrugında ütkän xärbi künegülärdä inde täcribä tuplağan ide.
