17nçe fivral’ könne kiç, Piramidanıñ disko-klubında tatar yäşläre tatarça biede häm gel tatar muzıkası yañğırap tordı. Bulmas disezme? Anda «Tatar radiosı» biü muzıkası festivalen ütkärde häm iñ yaxşı cırçını, iñ yaxşı biü cıyıntığın, iñ şäp prodyuserlarnı büläkläw tantanasın ütkärde.
Tatarça biü kiçäsenä, äle atna urtasında şul xätle keşe kiler dip, oyıştıruçılar üzläre dä kötmägän bulğan. Piramida küñel açu üzäge saqçılarınıñ centekläp tikşerep kertülärenä dä, uramda säğät yarımlap çiratta torular da, 200 sumlıq bilet bäyäse dä qurqıtmağan tatar yäşlären. 250 keşe sıydırışlı disko-klubta çişenü bülmälärendä tun elärgä buş elmäk qalmağan, biü mäydanında urın bulmağan.
Tatar estradasında biü muzıkası ölkäsendä eşläwçe artistlarnı, törkemnärne, prodyuserlarnı, aña bulışlıq itüçe mäğlümat çaraların barlap çığu omtılışın «Tatar radiosı» häm «Bars-Media» şirkäte yasadı.Küpmeder waqıt eçendä, «Tatarstan yäşläre» gäzite uquçıları häm «Tatar radiosı» tıñlawçıları, iñ yaxşı biü köyläre, başqaruçılar, biü köyläre cıyıntıqları öçen tawış birgän bulğan.
Häm şularğa qarap, bäygedä, 12 tördä ciñüçelär bilgelängän. Alar şunda uq, disko-klubta yäşlär aldında çığış yasap, maxsus diplomnar belän büläklände. «2002 yılda İñ yaxşı video-klip»nı Liliär digän yäş çırçı töşergän ikän. «İñ yaxşı başlanğıç» , ütkän yılda Läysän Ğimaeva häm yaña cırçı Sılu icatında bulğan. «Tatar radio»sı tıñlawçıları fikerençä, iñ yaxşı cıyıntıqnı «Zö-Läy-Lä» triosı äzerlägän. «Zö-Läy-Lä» qızları monı üzläre dä kötmägän. Bu xaqta «Azatlıq» radiosı xäbärçesenä trio qızları - Zölfiä Wälieva häm Läysän Mäxmütova äytte.
Ä ul arada biü kiçäse däwam itte. «2003nçe yılnıñ İñ yaxşı prodyuserı» - Ämir İslamov bulıp çıqtı, «iñ yaxşı çırçı» - Mälikä. Biü köyären başqara torğan iñ yaxşı törkem – «Qazan yegetläre».
«İñ yaxşı Dj» itep – «Käyef-promo» digän berläşmä tabıldı. Oyıştıruçılar süzlärençä, bu ciñüçelärne «Tatar radiosı» tıñlawçıları saylağan. Büläkläw tantanası da, bäyge üze dä şunı kürsätä: tatar estradasında yäşlär küñelenä xuş kilerlek köylär bar häm Piramidada tatarça diskoteka ütkärü - tabış kiterä torğan proyekt bula ala.
Bikä Timerova.
